{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa023.htm","path":"bib/vul/psa023.htm","source_url":"https://sacred-texts.com/bib/vul/psa023.htm","text":"1\u00a0Prima sabbati. Psalmus David. [Domini est terra, et plenitudo ejus;\n orbis terrarum, et universi qui habitant in eo.\n2\u00a0Quia ipse super maria fundavit eum,\n et super flumina pr\u00e6paravit eum.\n3\u00a0Quis ascendet in montem Domini?\n aut quis stabit in loco sancto ejus?\n4\u00a0Innocens manibus et mundo corde,\n qui non accepit in vano animam suam,\n nec juravit in dolo proximo suo:\n5\u00a0hic accipiet benedictionem a Domino,\n et misericordiam a Deo salutari suo.\n6\u00a0H\u00e6c est generatio qu\u00e6rentium eum,\n qu\u00e6rentium faciem Dei Jacob.\n7\u00a0Attollite portas, principes, vestras,\n et elevamini, port\u00e6 \u00e6ternales,\n et introibit rex glori\u00e6.\n8\u00a0Quis est iste rex glori\u00e6?\n Dominus fortis et potens,\n Dominus potens in pr\u00e6lio.\n9\u00a0Attollite portas, principes, vestras,\n et elevamini, port\u00e6 \u00e6ternales,\n et introibit rex glori\u00e6.\n10\u00a0Quis est iste rex glori\u00e6?\n Dominus virtutum ipse est rex glori\u00e6.]","title":"Vulgate: Psalms: Psalms Chapter 23","type":"page"}