{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa024.htm","path":"bib/vul/psa024.htm","source_url":"https://sacred-texts.com/bib/vul/psa024.htm","text":"1\u00a0In finem. Psalmus David. [Ad te, Domine, levavi animam meam:\n2\u00a0Deus meus, in te confido; non erubescam.\n3\u00a0Neque irrideant me inimici mei:\n etenim universi qui sustinent te, non confundentur.\n4\u00a0Confundantur omnes iniqua agentes supervacue.\n Vias tuas, Domine, demonstra mihi,\n et semitas tuas edoce me.\n5\u00a0Dirige me in veritate tua, et doce me,\n quia tu es Deus salvator meus,\n et te sustinui tota die.\n6\u00a0Reminiscere miserationum tuarum, Domine,\n et misericordiarum tuarum qu\u00e6 a s\u00e6culo sunt.\n7\u00a0Delicta juventutis me\u00e6, et ignorantias meas, ne memineris.\n Secundum misericordiam tuam memento mei tu,\n propter bonitatem tuam, Domine.\n8\u00a0Dulcis et rectus Dominus;\n propter hoc legem dabit delinquentibus in via.\n9\u00a0Diriget mansuetos in judicio;\n docebit mites vias suas.\n10\u00a0Univers\u00e6 vi\u00e6 Domini, misericordia et veritas,\n requirentibus testamentum ejus et testimonia ejus.\n11\u00a0Propter nomen tuum, Domine,\n propitiaberis peccato meo; multum est enim.\n12\u00a0Quis est homo qui timet Dominum?\n legem statuit ei in via quam elegit.\n13\u00a0Anima ejus in bonis demorabitur,\n et semen ejus h\u00e6reditabit terram.\n14\u00a0Firmamentum est Dominus timentibus eum;\n et testamentum ipsius ut manifestetur illis.\n15\u00a0Oculi mei semper ad Dominum,\n quoniam ipse evellet de laqueo pedes meos.\n16\u00a0Respice in me, et miserere mei,\n quia unicus et pauper sum ego.\n17\u00a0Tribulationes cordis mei multiplicat\u00e6 sunt:\n de necessitatibus meis erue me.\n18\u00a0Vide humilitatem meam et laborem meum,\n et dimitte universa delicta mea.\n19\u00a0Respice inimicos meos, quoniam multiplicati sunt,\n et odio iniquo oderunt me.\n20\u00a0Custodi animam meam, et erue me:\n non erubescam, quoniam speravi in te.\n21\u00a0Innocentes et recti adh\u00e6serunt mihi,\n quia sustinui te.\n22\u00a0Libera, Deus, Isra\u00ebl\n ex omnibus tribulationibus suis.]","title":"Vulgate: Psalms: Psalms Chapter 24","type":"page"}