{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa025.htm","path":"bib/vul/psa025.htm","source_url":"https://sacred-texts.com/bib/vul/psa025.htm","text":"1\u00a0In finem. Psalmus David. [Judica me, Domine, quoniam ego in innocentia mea ingressus sum,\n et in Domino sperans non infirmabor.\n2\u00a0Proba me, Domine, et tenta me;\n ure renes meos et cor meum.\n3\u00a0Quoniam misericordia tua ante oculos meos est,\n et complacui in veritate tua.\n4\u00a0Non sedi cum concilio vanitatis,\n et cum iniqua gerentibus non introibo.\n5\u00a0Odivi ecclesiam malignantium,\n et cum impiis non sedebo.\n6\u00a0Lavabo inter innocentes manus meas,\n et circumdabo altare tuum, Domine:\n7\u00a0ut audiam vocem laudis,\n et enarrem universa mirabilia tua.\n8\u00a0Domine, dilexi decorem domus tu\u00e6,\n et locum habitationis glori\u00e6 tu\u00e6.\n9\u00a0Ne perdas cum impiis, Deus, animam meam,\n et cum viris sanguinum vitam meam:\n10\u00a0in quorum manibus iniquitates sunt;\n dextera eorum repleta est muneribus.\n11\u00a0Ego autem in innocentia mea ingressus sum;\n redime me, et miserere mei.\n12\u00a0Pes meus stetit in directo;\n in ecclesiis benedicam te, Domine.]","title":"Vulgate: Psalms: Psalms Chapter 25","type":"page"}