{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa026.htm","path":"bib/vul/psa026.htm","source_url":"https://sacred-texts.com/bib/vul/psa026.htm","text":"1\u00a0Psalmus David, priusquam liniretur. [Dominus illuminatio mea et salus mea: quem timebo?\n Dominus protector vit\u00e6 me\u00e6:\n a quo trepidabo?\n2\u00a0Dum appropiant super me nocentes ut edant carnes meas,\n qui tribulant me inimici mei,\n ipsi infirmati sunt et ceciderunt.\n3\u00a0Si consistant adversum me castra, non timebit cor meum;\n si exsurgat adversum me pr\u00e6lium, in hoc ego sperabo.\n4\u00a0Unam petii a Domino, hanc requiram,\n ut inhabitem in domo Domini omnibus diebus vit\u00e6 me\u00e6;\n ut videam voluptatem Domini, et visitem templum ejus.\n5\u00a0Quoniam abscondit me in tabernaculo suo;\n in die malorum protexit me in abscondito tabernaculi sui.\n6\u00a0In petra exaltavit me,\n et nunc exaltavit caput meum super inimicos meos.\n Circuivi, et immolavi in tabernaculo ejus hostiam vociferationis;\n cantabo, et psalmum dicam Domino.\n7\u00a0Exaudi, Domine, vocem meam, qua clamavi ad te;\n miserere mei, et exaudi me.\n8\u00a0Tibi dixit cor meum: Exquisivit te facies mea;\n faciem tuam, Domine, requiram.\n9\u00a0Ne avertas faciem tuam a me;\n ne declines in ira a servo tuo.\n Adjutor meus esto; ne derelinquas me,\n neque despicias me, Deus salutaris meus.\n10\u00a0Quoniam pater meus et mater mea dereliquerunt me;\n Dominus autem assumpsit me.\n11\u00a0Legem pone mihi, Domine, in via tua,\n et dirige me in semitam rectam, propter inimicos meos.\n12\u00a0Ne tradideris me in animas tribulantium me,\n quoniam insurrexerunt in me testes iniqui,\n et mentita est iniquitas sibi.\n13\u00a0Credo videre bona Domini in terra viventium.\n14\u00a0Expecta Dominum, viriliter age:\n et confortetur cor tuum, et sustine Dominum.]","title":"Vulgate: Psalms: Psalms Chapter 26","type":"page"}