{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa027.htm","path":"bib/vul/psa027.htm","source_url":"https://sacred-texts.com/bib/vul/psa027.htm","text":"1\u00a0Psalmus ipsi David. [Ad te, Domine, clamabo; Deus meus, ne sileas a me:\n nequando taceas a me, et assimilabor descendentibus in lacum.\n2\u00a0Exaudi, Domine, vocem deprecationis me\u00e6 dum oro ad te;\n dum extollo manus meas ad templum sanctum tuum.\n3\u00a0Ne simul trahas me cum peccatoribus,\n et cum operantibus iniquitatem ne perdas me;\n qui loquuntur pacem cum proximo suo,\n mala autem in cordibus eorum.\n4\u00a0Da illis secundum opera eorum,\n et secundum nequitiam adinventionum ipsorum.\n Secundum opera manuum eorum tribue illis;\n redde retributionem eorum ipsis.\n5\u00a0Quoniam non intellexerunt opera Domini,\n et in opera manuum ejus destrues illos,\n et non \u00e6dificabis eos.\n6\u00a0Benedictus Dominus,\n quoniam exaudivit vocem deprecationis me\u00e6.\n7\u00a0Dominus adjutor meus et protector meus;\n in ipso speravit cor meum, et adjutus sum:\n et refloruit caro mea,\n et ex voluntate mea confitebor ei.\n8\u00a0Dominus fortitudo plebis su\u00e6,\n et protector salvationum christi sui est.\n9\u00a0Salvum fac populum tuum, Domine, et benedic h\u00e6reditati tu\u00e6;\n et rege eos, et extolle illos usque in \u00e6ternum.]","title":"Vulgate: Psalms: Psalms Chapter 27","type":"page"}