{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa028.htm","path":"bib/vul/psa028.htm","source_url":"https://sacred-texts.com/bib/vul/psa028.htm","text":"1\u00a0Psalmus David, in consummatione tabernaculi. [Afferte Domino, filii Dei,\n afferte Domino filios arietum.\n2\u00a0Afferte Domino gloriam et honorem;\n afferte Domino gloriam nomini ejus;\n adorate Dominum in atrio sancto ejus.\n3\u00a0Vox Domini super aquas;\n Deus majestatis intonuit:\n Dominus super aquas multas.\n4\u00a0Vox Domini in virtute;\n vox Domini in magnificentia.\n5\u00a0Vox Domini confringentis cedros,\n et confringet Dominus cedros Libani:\n6\u00a0et comminuet eas, tamquam vitulum Libani,\n et dilectus quemadmodum filius unicornium.\n7\u00a0Vox Domini intercidentis flammam ignis;\n8\u00a0vox Domini concutientis desertum:\n et commovebit Dominus desertum Cades.\n9\u00a0Vox Domini pr\u00e6parantis cervos:\n et revelabit condensa,\n et in templo ejus omnes dicent gloriam.\n10\u00a0Dominus diluvium inhabitare facit,\n et sedebit Dominus rex in \u00e6ternum.\n11\u00a0Dominus virtutem populo suo dabit;\n Dominus benedicet populo suo in pace.]","title":"Vulgate: Psalms: Psalms Chapter 28","type":"page"}