{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa029.htm","path":"bib/vul/psa029.htm","source_url":"https://sacred-texts.com/bib/vul/psa029.htm","text":"1 Psalmus cantici, in dedicatione domus David.\n2\u00a0[Exaltabo te, Domine, quoniam suscepisti me,\n nec delectasti inimicos meos super me.\n3\u00a0Domine Deus meus, clamavi ad te, et sanasti me.\n4\u00a0Domine, eduxisti ab inferno animam meam;\n salvasti me a descendentibus in lacum.\n5\u00a0Psallite Domino, sancti ejus;\n et confitemini memori\u00e6 sanctitatis ejus.\n6\u00a0Quoniam ira in indignatione ejus,\n et vita in voluntate ejus:\n ad vesperum demorabitur fletus,\n et ad matutinum l\u00e6titia.\n7\u00a0Ego autem dixi in abundantia mea:\n Non movebor in \u00e6ternum.\n8\u00a0Domine, in voluntate tua pr\u00e6stitisti decori meo virtutem;\n avertisti faciem tuam a me, et factus sum conturbatus.\n9\u00a0Ad te, Domine, clamabo,\n et ad Deum meum deprecabor.\n10\u00a0Qu\u00e6 utilitas in sanguine meo,\n dum descendo in corruptionem?\n numquid confitebitur tibi pulvis,\n aut annuntiabit veritatem tuam?\n11\u00a0Audivit Dominus, et misertus est mei;\n Dominus factus est adjutor meus.\n12\u00a0Convertisti planctum meum in gaudium mihi;\n conscidisti saccum meum, et circumdedisti me l\u00e6titia:\n13\u00a0ut cantet tibi gloria mea, et non compungar.\n Domine Deus meus, in \u00e6ternum confitebor tibi.]","title":"Vulgate: Psalms: Psalms Chapter 29","type":"page"}