{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa030.htm","path":"bib/vul/psa030.htm","source_url":"https://sacred-texts.com/bib/vul/psa030.htm","text":"1 In finem. Psalmus David, pro extasi.\n2\u00a0[In te, Domine, speravi;\n non confundar in \u00e6ternum:\n in justitia tua libera me.\n3\u00a0Inclina ad me aurem tuam;\n accelera ut eruas me.\n Esto mihi in Deum protectorem,\n et in domum refugii, ut salvum me facias:\n4\u00a0quoniam fortitudo mea et refugium meum es tu;\n et propter nomen tuum deduces me et enutries me.\n5\u00a0Educes me de laqueo hoc quem absconderunt mihi,\n quoniam tu es protector meus.\n6\u00a0In manus tuas commendo spiritum meum;\n redemisti me, Domine Deus veritatis.\n7\u00a0Odisti observantes vanitates supervacue;\n ego autem in Domino speravi.\n8\u00a0Exsultabo, et l\u00e6tabor in misericordia tua,\n quoniam respexisti humilitatem meam;\n salvasti de necessitatibus animam meam.\n9\u00a0Nec conclusisti me in manibus inimici:\n statuisti in loco spatioso pedes meos.\n10\u00a0Miserere mei, Domine, quoniam tribulor;\n conturbatus est in ira oculus meus, anima mea, et venter meus.\n11\u00a0Quoniam defecit in dolore vita mea,\n et anni mei in gemitibus.\n Infirmata est in paupertate virtus mea,\n et ossa mea conturbata sunt.\n12\u00a0Super omnes inimicos meos factus sum opprobrium,\n et vicinis meis valde, et timor notis meis;\n qui videbant me foras fugerunt a me.\n13\u00a0Oblivioni datus sum, tamquam mortuus a corde;\n factus sum tamquam vas perditum:\n14\u00a0quoniam audivi vituperationem multorum commorantium in circuitu.\n In eo dum convenirent simul adversum me,\n accipere animam meam consiliati sunt.\n15\u00a0Ego autem in te speravi, Domine;\n dixi: Deus meus es tu;\n16\u00a0in manibus tuis sortes me\u00e6:\n eripe me de manu inimicorum meorum, et a persequentibus me.\n17\u00a0Illustra faciem tuam super servum tuum;\n salvum me fac in misericordia tua.\n18\u00a0Domine, non confundar, quoniam invocavi te.\n Erubescant impii, et deducantur in infernum;\n19\u00a0muta fiant labia dolosa,\n qu\u00e6 loquuntur adversus justum iniquitatem,\n in superbia, et in abusione.\n20\u00a0Quam magna multitudo dulcedinis tu\u00e6, Domine,\n quam abscondisti timentibus te;\n perfecisti eis qui sperant in te in conspectu filiorum hominum!\n21\u00a0Abscondes eos in abscondito faciei tu\u00e6 a conturbatione hominum;\n proteges eos in tabernaculo tuo, a contradictione linguarum.\n22\u00a0Benedictus Dominus,\n quoniam mirificavit misericordiam suam mihi in civitate munita.\n23\u00a0Ego autem dixi in excessu mentis me\u00e6:\n Projectus sum a facie oculorum tuorum:\n ideo exaudisti vocem orationis me\u00e6, dum clamarem ad te.\n24\u00a0Diligite Dominum, omnes sancti ejus,\n quoniam veritatem requiret Dominus,\n et retribuet abundanter facientibus superbiam.\n25\u00a0Viriliter agite, et confortetur cor vestrum,\n omnes qui speratis in Domino.]","title":"Vulgate: Psalms: Psalms Chapter 30","type":"page"}