{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa033.htm","path":"bib/vul/psa033.htm","source_url":"https://sacred-texts.com/bib/vul/psa033.htm","text":"1 Davidi, cum immutavit vultum suum coram Achimelech, et dimisit eum, et abiit.\n2\u00a0[Benedicam Dominum in omni tempore;\n semper laus ejus in ore meo.\n3\u00a0In Domino laudabitur anima mea:\n audiant mansueti, et l\u00e6tentur.\n4\u00a0Magnificate Dominum mecum,\n et exaltemus nomen ejus in idipsum.\n5\u00a0Exquisivi Dominum, et exaudivit me;\n et ex omnibus tribulationibus meis eripuit me.\n6\u00a0Accedite ad eum, et illuminamini;\n et facies vestr\u00e6 non confundentur.\n7\u00a0Iste pauper clamavit, et Dominus exaudivit eum,\n et de omnibus tribulationibus ejus salvavit eum.\n8\u00a0Immittet angelus Domini in circuitu timentium eum,\n et eripiet eos.\n9\u00a0Gustate et videte quoniam suavis est Dominus;\n beatus vir qui sperat in eo.\n10\u00a0Timete Dominum, omnes sancti ejus,\n quoniam non est inopia timentibus eum.\n11\u00a0Divites eguerunt, et esurierunt;\n inquirentes autem Dominum non minuentur omni bono.\n12\u00a0Venite, filii; audite me:\n timorem Domini docebo vos.\n13\u00a0Quis est homo qui vult vitam;\n diligit dies videre bonos?\n14\u00a0Prohibe linguam tuam a malo,\n et labia tua ne loquantur dolum.\n15\u00a0Diverte a malo, et fac bonum;\n inquire pacem, et persequere eam.\n16\u00a0Oculi Domini super justos,\n et aures ejus in preces eorum.\n17\u00a0Vultus autem Domini super facientes mala,\n ut perdat de terra memoriam eorum.\n18\u00a0Clamaverunt justi, et Dominus exaudivit eos;\n et ex omnibus tribulationibus eorum liberavit eos.\n19\u00a0Juxta est Dominus iis qui tribulato sunt corde,\n et humiles spiritu salvabit.\n20\u00a0Mult\u00e6 tribulationes justorum;\n et de omnibus his liberabit eos Dominus.\n21\u00a0Custodit Dominus omnia ossa eorum:\n unum ex his non conteretur.\n22\u00a0Mors peccatorum pessima;\n et qui oderunt justum delinquent.\n23\u00a0Redimet Dominus animas servorum suorum,\n et non delinquent omnes qui sperant in eo.]","title":"Vulgate: Psalms: Psalms Chapter 33","type":"page"}