{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa034.htm","path":"bib/vul/psa034.htm","source_url":"https://sacred-texts.com/bib/vul/psa034.htm","text":"1\u00a0Ipsi David. [Judica, Domine, nocentes me;\n expugna impugnantes me.\n2\u00a0Apprehende arma et scutum,\n et exsurge in adjutorium mihi.\n3\u00a0Effunde frameam, et conclude adversus eos qui persequuntur me;\n dic anim\u00e6 me\u00e6: Salus tua ego sum.\n4\u00a0Confundantur et revereantur qu\u00e6rentes animam meam;\n avertantur retrorsum et confundantur cogitantes mihi mala.\n5\u00a0Fiant tamquam pulvis ante faciem venti,\n et angelus Domini coarctans eos.\n6\u00a0Fiat via illorum tenebr\u00e6 et lubricum,\n et angelus Domini persequens eos.\n7\u00a0Quoniam gratis absconderunt mihi interitum laquei sui; supervacue exprobraverunt animam meam.\n8\u00a0Veniat illi laqueus quem ignorat,\n et captio quam abscondit apprehendat eum,\n et in laqueum cadat in ipsum.\n9\u00a0Anima autem mea exsultabit in Domino,\n et delectabitur super salutari suo.\n10\u00a0Omnia ossa mea dicent:\n Domine, quis similis tibi?\n eripiens inopem de manu fortiorum ejus;\n egenum et pauperem a diripientibus eum.\n11\u00a0Surgentes testes iniqui,\n qu\u00e6 ignorabam interrogabant me.\n12\u00a0Retribuebant mihi mala pro bonis,\n sterilitatem anim\u00e6 me\u00e6.\n13\u00a0Ego autem, cum mihi molesti essent, induebar cilicio;\n humiliabam in jejunio animam meam,\n et oratio mea in sinu meo convertetur.\n14\u00a0Quasi proximum et quasi fratrem nostrum sic complacebam;\n quasi lugens et contristatus sic humiliabar.\n15\u00a0Et adversum me l\u00e6tati sunt, et convenerunt;\n congregata sunt super me flagella, et ignoravi.\n16\u00a0Dissipati sunt, nec compuncti;\n tentaverunt me, subsannaverunt me subsannatione;\n frenduerunt super me dentibus suis.\n17\u00a0Domine, quando respicies?\n Restitue animam meam a malignitate eorum;\n a leonibus unicam meam.\n18\u00a0Confitebor tibi in ecclesia magna; in populo gravi laudabo te.\n19\u00a0Non supergaudeant mihi qui adversantur mihi inique,\n qui oderunt me gratis, et annuunt oculis.\n20\u00a0Quoniam mihi quidem pacifice loquebantur;\n et in iracundia terr\u00e6 loquentes, dolos cogitabant.\n21\u00a0Et dilataverunt super me os suum;\n dixerunt: Euge, euge! viderunt oculi nostri.\n22\u00a0Vidisti, Domine: ne sileas;\n Domine, ne discedas a me.\n23\u00a0Exsurge et intende judicio meo, Deus meus;\n et Dominus meus, in causam meam.\n24\u00a0Judica me secundum justitiam tuam, Domine Deus meus,\n et non supergaudeant mihi.\n25\u00a0Non dicant in cordibus suis: Euge, euge, anim\u00e6 nostr\u00e6;\n nec dicant: Devoravimus eum.\n26\u00a0Erubescant et revereantur simul qui gratulantur malis meis;\n induantur confusione et reverentia qui magna loquuntur super me.\n27\u00a0Exsultent et l\u00e6tentur qui volunt justitiam meam;\n et dicant semper: Magnificetur Dominus, qui volunt pacem servi ejus.\n28\u00a0Et lingua mea meditabitur justitiam tuam;\n tota die laudem tuam.]","title":"Vulgate: Psalms: Psalms Chapter 34","type":"page"}