{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa036.htm","path":"bib/vul/psa036.htm","source_url":"https://sacred-texts.com/bib/vul/psa036.htm","text":"1\u00a0Psalmus ipsi David. [Noli \u00e6mulari in malignantibus,\n neque zelaveris facientes iniquitatem:\n2\u00a0quoniam tamquam f\u0153num velociter arescent,\n et quemadmodum olera herbarum cito decident.\n3\u00a0Spera in Domino, et fac bonitatem;\n et inhabita terram, et pasceris in divitiis ejus.\n4\u00a0Delectare in Domino,\n et dabit tibi petitiones cordis tui.\n5\u00a0Revela Domino viam tuam,\n et spera in eo, et ipse faciet.\n6\u00a0Et educet quasi lumen justitiam tuam,\n et judicium tuum tamquam meridiem.\n7\u00a0Subditus esto Domino, et ora eum.\n Noli \u00e6mulari in eo qui prosperatur in via sua;\n in homine faciente injustitias.\n8\u00a0Desine ab ira, et derelinque furorem;\n noli \u00e6mulari ut maligneris.\n9\u00a0Quoniam qui malignantur exterminabuntur;\n sustinentes autem Dominum, ipsi h\u00e6reditabunt terram.\n10\u00a0Et adhuc pusillum, et non erit peccator;\n et qu\u00e6res locum ejus, et non invenies.\n11\u00a0Mansueti autem h\u00e6reditabunt terram,\n et delectabuntur in multitudine pacis.\n12\u00a0Observabit peccator justum,\n et stridebit super eum dentibus suis.\n13\u00a0Dominus autem irridebit eum,\n quoniam prospicit quod veniet dies ejus.\n14\u00a0Gladium evaginaverunt peccatores;\n intenderunt arcum suum:\n ut dejiciant pauperem et inopem,\n ut trucident rectos corde.\n15\u00a0Gladius eorum intret in corda ipsorum,\n et arcus eorum confringatur.\n16\u00a0Melius est modicum justo,\n super divitias peccatorum multas:\n17\u00a0quoniam brachia peccatorum conterentur:\n confirmat autem justos Dominus.\n18\u00a0Novit Dominus dies immaculatorum,\n et h\u00e6reditas eorum in \u00e6ternum erit.\n19\u00a0Non confundentur in tempore malo,\n et in diebus famis saturabuntur:\n20\u00a0quia peccatores peribunt.\n Inimici vero Domini mox ut honorificati fuerint et exaltati,\n deficientes quemadmodum fumus deficient.\n21\u00a0Mutuabitur peccator, et non solvet;\n justus autem miseretur et tribuet:\n22\u00a0quia benedicentes ei h\u00e6reditabunt terram;\n maledicentes autem ei disperibunt.\n23\u00a0Apud Dominum gressus hominis dirigentur,\n et viam ejus volet.\n24\u00a0Cum ceciderit, non collidetur,\n quia Dominus supponit manum suam.\n25\u00a0Junior fui, etenim senui;\n et non vidi justum derelictum,\n nec semen ejus qu\u00e6rens panem.\n26\u00a0Tota die miseretur et commodat;\n et semen illius in benedictione erit.\n27\u00a0Declina a malo, et fac bonum,\n et inhabita in s\u00e6culum s\u00e6culi:\n28\u00a0quia Dominus amat judicium,\n et non derelinquet sanctos suos:\n in \u00e6ternum conservabuntur.\n Injusti punientur,\n et semen impiorum peribit.\n29\u00a0Justi autem h\u00e6reditabunt terram,\n et inhabitabunt in s\u00e6culum s\u00e6culi super eam.\n30\u00a0Os justi meditabitur sapientiam,\n et lingua ejus loquetur judicium.\n31\u00a0Lex Dei ejus in corde ipsius,\n et non supplantabuntur gressus ejus.\n32\u00a0Considerat peccator justum,\n et qu\u00e6rit mortificare eum.\n33\u00a0Dominus autem non derelinquet eum in manibus ejus,\n nec damnabit eum cum judicabitur illi.\n34\u00a0Exspecta Dominum, et custodi viam ejus,\n et exaltabit te ut h\u00e6reditate capias terram:\n cum perierint peccatores, videbis.\n35\u00a0Vidi impium superexaltatum,\n et elevatum sicut cedros Libani:\n36\u00a0et transivi, et ecce non erat;\n et qu\u00e6sivi eum, et non est inventus locus ejus.\n37\u00a0Custodi innocentiam, et vide \u00e6quitatem,\n quoniam sunt reliqui\u00e6 homini pacifico.\n38\u00a0Injusti autem disperibunt simul;\n reliqui\u00e6 impiorum interibunt.\n39\u00a0Salus autem justorum a Domino;\n et protector eorum in tempore tribulationis.\n40\u00a0Et adjuvabit eos Dominus, et liberabit eos;\n et eruet eos a peccatoribus, et salvabit eos,\n quia speraverunt in eo.]","title":"Vulgate: Psalms: Psalms Chapter 36","type":"page"}