{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa037.htm","path":"bib/vul/psa037.htm","source_url":"https://sacred-texts.com/bib/vul/psa037.htm","text":"1 Psalmus David, in rememorationem de sabbato.\n2\u00a0[Domine, ne in furore tuo arguas me,\n neque in ira tua corripias me:\n3\u00a0quoniam sagitt\u00e6 tu\u00e6 infix\u00e6 sunt mihi,\n et confirmasti super me manum tuam.\n4\u00a0Non est sanitas in carne mea, a facie ir\u00e6 tu\u00e6;\n non est pax ossibus meis, a facie peccatorum meorum:\n5\u00a0quoniam iniquitates me\u00e6 supergress\u00e6 sunt caput meum,\n et sicut onus grave gravat\u00e6 sunt super me.\n6\u00a0Putruerunt et corrupt\u00e6 sunt cicatrices me\u00e6,\n a facie insipienti\u00e6 me\u00e6.\n7\u00a0Miser factus sum et curvatus sum usque in finem;\n tota die contristatus ingrediebar.\n8\u00a0Quoniam lumbi mei impleti sunt illusionibus,\n et non est sanitas in carne mea.\n9\u00a0Afflictus sum, et humiliatus sum nimis;\n rugiebam a gemitu cordis mei.\n10\u00a0Domine, ante te omne desiderium meum,\n et gemitus meus a te non est absconditus.\n11\u00a0Cor meum conturbatum est;\n dereliquit me virtus mea, et lumen oculorum meorum,\n et ipsum non est mecum.\n12\u00a0Amici mei et proximi mei adversum me appropinquaverunt, et steterunt;\n et qui juxta me erant, de longe steterunt:\n et vim faciebant qui qu\u00e6rebant animam meam.\n13\u00a0Et qui inquirebant mala mihi, locuti sunt vanitates,\n et dolos tota die meditabantur.\n14\u00a0Ego autem, tamquam surdus, non audiebam;\n et sicut mutus non aperiens os suum.\n15\u00a0Et factus sum sicut homo non audiens,\n et non habens in ore suo redargutiones.\n16\u00a0Quoniam in te, Domine, speravi;\n tu exaudies me, Domine Deus meus.\n17\u00a0Quia dixi: Nequando supergaudeant mihi inimici mei;\n et dum commoventur pedes mei, super me magna locuti sunt.\n18\u00a0Quoniam ego in flagella paratus sum,\n et dolor meus in conspectu meo semper.\n19\u00a0Quoniam iniquitatem meam annuntiabo,\n et cogitabo pro peccato meo.\n20\u00a0Inimici autem mei vivunt, et confirmati sunt super me:\n et multiplicati sunt qui oderunt me inique.\n21\u00a0Qui retribuunt mala pro bonis detrahebant mihi,\n quoniam sequebar bonitatem.\n22\u00a0Ne derelinquas me, Domine Deus meus;\n ne discesseris a me.\n23\u00a0Intende in adjutorium meum,\n Domine Deus salutis me\u00e6.]","title":"Vulgate: Psalms: Psalms Chapter 37","type":"page"}