{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa038.htm","path":"bib/vul/psa038.htm","source_url":"https://sacred-texts.com/bib/vul/psa038.htm","text":"1 In finem, ipsi Idithun. Canticum David.\n2\u00a0[Dixi: Custodiam vias meas:\n ut non delinquam in lingua mea.\n Posui ori meo custodiam,\n cum consisteret peccator adversum me.\n3\u00a0Obmutui, et humiliatus sum, et silui a bonis;\n et dolor meus renovatus est.\n4\u00a0Concaluit cor meum intra me;\n et in meditatione mea exardescet ignis.\n5\u00a0Locutus sum in lingua mea:\n Notum fac mihi, Domine, finem meum,\n et numerum dierum meorum quis est,\n ut sciam quid desit mihi.\n6\u00a0Ecce mensurabiles posuisti dies meos,\n et substantia mea tamquam nihilum ante te.\n Verumtamen universa vanitas, omnis homo vivens.\n7\u00a0Verumtamen in imagine pertransit homo;\n sed et frustra conturbatur:\n thesaurizat, et ignorat cui congregabit ea.\n8\u00a0Et nunc qu\u00e6 est exspectatio mea: nonne Dominus?\n et substantia mea apud te est.\n9\u00a0Ab omnibus iniquitatibus meis erue me:\n opprobrium insipienti dedisti me.\n10\u00a0Obmutui, et non aperui os meum,\n quoniam tu fecisti;\n11\u00a0amove a me plagas tuas.\n12\u00a0A fortitudine manus tu\u00e6 ego defeci in increpationibus:\n propter iniquitatem corripuisti hominem.\n Et tabescere fecisti sicut araneam animam ejus:\n verumtamen vane conturbatur omnis homo.\n13\u00a0Exaudi orationem meam, Domine, et deprecationem meam;\n auribus percipe lacrimas meas.\n Ne sileas, quoniam advena ego sum apud te,\n et peregrinus sicut omnes patres mei.\n14\u00a0Remitte mihi, ut refrigerer\n priusquam abeam et amplius non ero.]","title":"Vulgate: Psalms: Psalms Chapter 38","type":"page"}