{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa039.htm","path":"bib/vul/psa039.htm","source_url":"https://sacred-texts.com/bib/vul/psa039.htm","text":"1 In finem. Psalmus ipsi David.\n2\u00a0[Exspectans exspectavi Dominum,\n et intendit mihi.\n3\u00a0Et exaudivit preces meas,\n et eduxit me de lacu miseri\u00e6 et de luto f\u00e6cis.\n Et statuit super petram pedes meos,\n et direxit gressus meos.\n4\u00a0Et immisit in os meum canticum novum,\n carmen Deo nostro.\n Videbunt multi, et timebunt,\n et sperabunt in Domino.\n5\u00a0Beatus vir cujus est nomen Domini spes ejus,\n et non respexit in vanitates et insanias falsas.\n6\u00a0Multa fecisti tu, Domine Deus meus, mirabilia tua;\n et cogitationibus tuis non est qui similis sit tibi.\n Annuntiavi et locutus sum:\n multiplicati sunt super numerum.\n7\u00a0Sacrificium et oblationem noluisti;\n aures autem perfecisti mihi.\n Holocaustum et pro peccato non postulasti;\n8\u00a0tunc dixi: Ecce venio.\n In capite libri scriptum est de me,\n9\u00a0ut facerem voluntatem tuam.\n Deus meus, volui,\n et legem tuam in medio cordis mei.\n10\u00a0Annuntiavi justitiam tuam in ecclesia magna;\n ecce labia mea non prohibebo: Domine, tu scisti.\n11\u00a0Justitiam tuam non abscondi in corde meo;\n veritatem tuam et salutare tuum dixi;\n non abscondi misericordiam tuam et veritatem tuam a concilio multo.\n12\u00a0Tu autem, Domine, ne longe facias miserationes tuas a me;\n misericordia tua et veritas tua semper susceperunt me.\n13\u00a0Quoniam circumdederunt me mala quorum non est numerus;\n comprehenderunt me iniquitates me\u00e6, et non potui ut viderem.\n Multiplicat\u00e6 sunt super capillos capitis mei,\n et cor meum dereliquit me.\n14\u00a0Complaceat tibi, Domine, ut eruas me;\n Domine, ad adjuvandum me respice.\n15\u00a0Confundantur et revereantur simul,\n qui qu\u00e6runt animam meam ut auferant eam;\n convertantur retrorsum et revereantur,\n qui volunt mihi mala.\n16\u00a0Ferant confestim confusionem suam,\n qui dicunt mihi: Euge, euge!\n17\u00a0Exsultent et l\u00e6tentur super te omnes qu\u00e6rentes te;\n et dicant semper: Magnificetur Dominus, qui diligunt salutare tuum.\n18\u00a0Ego autem mendicus sum et pauper;\n Dominus sollicitus est mei.\n Adjutor meus et protector meus tu es;\n Deus meus, ne tardaveris.]","title":"Vulgate: Psalms: Psalms Chapter 39","type":"page"}