{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa040.htm","path":"bib/vul/psa040.htm","source_url":"https://sacred-texts.com/bib/vul/psa040.htm","text":"1 In finem. Psalmus ipsi David.\n2\u00a0[Beatus qui intelligit super egenum et pauperem:\n in die mala liberabit eum Dominus.\n3\u00a0Dominus conservet eum, et vivificet eum,\n et beatum faciat eum in terra,\n et non tradat eum in animam inimicorum ejus.\n4\u00a0Dominus opem ferat illi super lectum doloris ejus;\n universum stratum ejus versasti in infirmitate ejus.\n5\u00a0Ego dixi: Domine, miserere mei;\n sana animam meam, quia peccavi tibi.\n6\u00a0Inimici mei dixerunt mala mihi:\n Quando morietur, et peribit nomen ejus?\n7\u00a0Et si ingrediebatur ut videret, vana loquebatur;\n cor ejus congregavit iniquitatem sibi.\n Egrediebatur foras et loquebatur.\n8\u00a0In idipsum adversum me susurrabant omnes inimici mei;\n adversum me cogitabant mala mihi.\n9\u00a0Verbum iniquum constituerunt adversum me:\n Numquid qui dormit non adjiciet ut resurgat?\n10\u00a0Etenim homo pacis me\u00e6 in quo speravi,\n qui edebat panes meos,\n magnificavit super me supplantationem.\n11\u00a0Tu autem, Domine, miserere mei,\n et resuscita me; et retribuam eis.\n12\u00a0In hoc cognovi quoniam voluisti me,\n quoniam non gaudebit inimicus meus super me.\n13\u00a0Me autem propter innocentiam suscepisti;\n et confirmasti me in conspectu tuo in \u00e6ternum.\n14\u00a0Benedictus Dominus Deus Isra\u00ebl\n a s\u00e6culo et usque in s\u00e6culum. Fiat, fiat.]","title":"Vulgate: Psalms: Psalms Chapter 40","type":"page"}