{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa041.htm","path":"bib/vul/psa041.htm","source_url":"https://sacred-texts.com/bib/vul/psa041.htm","text":"1 In finem. Intellectus filiis Core.\n2\u00a0[Quemadmodum desiderat cervus ad fontes aquarum,\n ita desiderat anima mea ad te, Deus.\n3\u00a0Sitivit anima mea ad Deum fortem, vivum;\n quando veniam, et apparebo ante faciem Dei?\n4\u00a0Fuerunt mihi lacrim\u00e6 me\u00e6 panes die ac nocte,\n dum dicitur mihi quotidie: Ubi est Deus tuus?\n5\u00a0H\u00e6c recordatus sum, et effudi in me animam meam,\n quoniam transibo in locum tabernaculi admirabilis, usque ad domum Dei,\n in voce exsultationis et confessionis, sonus epulantis.\n6\u00a0Quare tristis es, anima mea?\n et quare conturbas me?\n Spera in Deo, quoniam adhuc confitebor illi,\n salutare vultus mei,\n7\u00a0et Deus meus.\n Ad meipsum anima mea conturbata est:\n propterea memor ero tui de terra Jordanis et Hermoniim a monte modico.\n8\u00a0Abyssus abyssum invocat, in voce cataractarum tuarum;\n omnia excelsa tua, et fluctus tui super me transierunt.\n9\u00a0In die mandavit Dominus misericordiam suam,\n et nocte canticum ejus;\n apud me oratio Deo vit\u00e6 me\u00e6.\n10\u00a0Dicam Deo: Susceptor meus es;\n quare oblitus es mei?\n et quare contristatus incedo, dum affligit me inimicus?\n11\u00a0Dum confringuntur ossa mea,\n exprobraverunt mihi qui tribulant me inimici mei,\n dum dicunt mihi per singulos dies: Ubi est Deus tuus?\n12\u00a0Quare tristis es, anima mea?\n et quare conturbas me?\n Spera in Deo, quoniam adhuc confitebor illi,\n salutare vultus mei, et Deus meus.]","title":"Vulgate: Psalms: Psalms Chapter 41","type":"page"}