{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa044.htm","path":"bib/vul/psa044.htm","source_url":"https://sacred-texts.com/bib/vul/psa044.htm","text":"1 In finem, pro iis qui commutabuntur. Filiis Core, ad intellectum. Canticum pro dilecto.\n2\u00a0[Eructavit cor meum verbum bonum:\n dico ego opera mea regi.\n Lingua mea calamus scrib\u00e6\n velociter scribentis.\n3\u00a0Speciosus forma pr\u00e6 filiis hominum,\n diffusa est gratia in labiis tuis:\n propterea benedixit te Deus in \u00e6ternum.\n4\u00a0Accingere gladio tuo super femur tuum, potentissime.\n5\u00a0Specie tua et pulchritudine tua\n intende, prospere procede, et regna,\n propter veritatem, et mansuetudinem, et justitiam;\n et deducet te mirabiliter dextera tua.\n6\u00a0Sagitt\u00e6 tu\u00e6 acut\u00e6:\n populi sub te cadent,\n in corda inimicorum regis.\n7\u00a0Sedes tua, Deus, in s\u00e6culum s\u00e6culi;\n virga directionis virga regni tui.\n8\u00a0Dilexisti justitiam, et odisti iniquitatem;\n propterea unxit te Deus, Deus tuus,\n oleo l\u00e6titi\u00e6, pr\u00e6 consortibus tuis.\n9\u00a0Myrrha, et gutta, et casia a vestimentis tuis,\n a domibus eburneis; ex quibus delectaverunt te\n10\u00a0fili\u00e6 regum in honore tuo.\n Astitit regina a dextris tuis\n in vestitu deaurato, circumdata varietate.\n11\u00a0Audi, filia, et vide, et inclina aurem tuam;\n et obliviscere populum tuum, et domum patris tui.\n12\u00a0Et concupiscet rex decorem tuum,\n quoniam ipse est Dominus Deus tuus, et adorabunt eum.\n13\u00a0Et fili\u00e6 Tyri in muneribus vultum tuum deprecabuntur;\n omnes divites plebis.\n14\u00a0Omnis gloria ejus fili\u00e6 regis ab intus,\n in fimbriis aureis,\n15\u00a0circumamicta varietatibus.\n Adducentur regi virgines post eam;\n proxim\u00e6 ejus afferentur tibi.\n16\u00a0Afferentur in l\u00e6titia et exsultatione;\n adducentur in templum regis.\n17\u00a0Pro patribus tuis nati sunt tibi filii;\n constitues eos principes super omnem terram.\n18\u00a0Memores erunt nominis tui in omni generatione et generationem:\n propterea populi confitebuntur tibi in \u00e6ternum, et in s\u00e6culum s\u00e6culi.]","title":"Vulgate: Psalms: Psalms Chapter 44","type":"page"}