{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa045.htm","path":"bib/vul/psa045.htm","source_url":"https://sacred-texts.com/bib/vul/psa045.htm","text":"1 In finem, filiis Core, pro arcanis. Psalmus.\n2\u00a0[Deus noster refugium et virtus;\n adjutor in tribulationibus qu\u00e6 invenerunt nos nimis.\n3\u00a0Propterea non timebimus dum turbabitur terra,\n et transferentur montes in cor maris.\n4\u00a0Sonuerunt, et turbat\u00e6 sunt aqu\u00e6 eorum;\n conturbati sunt montes in fortitudine ejus.\n5\u00a0Fluminis impetus l\u00e6tificat civitatem Dei:\n sanctificavit tabernaculum suum Altissimus.\n6\u00a0Deus in medio ejus, non commovebitur;\n adjuvabit eam Deus mane diluculo.\n7\u00a0Conturbat\u00e6 sunt gentes, et inclinata sunt regna:\n dedit vocem suam, mota est terra.\n8\u00a0Dominus virtutum nobiscum;\n susceptor noster Deus Jacob.\n9\u00a0Venite, et videte opera Domini,\n qu\u00e6 posuit prodigia super terram,\n10\u00a0auferens bella usque ad finem terr\u00e6.\n Arcum conteret, et confringet arma,\n et scuta comburet igni.\n11\u00a0Vacate, et videte quoniam ego sum Deus;\n exaltabor in gentibus, et exaltabor in terra.\n12\u00a0Dominus virtutum nobiscum;\n susceptor noster Deus Jacob.]","title":"Vulgate: Psalms: Psalms Chapter 45","type":"page"}