{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa046.htm","path":"bib/vul/psa046.htm","source_url":"https://sacred-texts.com/bib/vul/psa046.htm","text":"1 In finem, pro filiis Core. Psalmus.\n2\u00a0[Omnes gentes, plaudite manibus;\n jubilate Deo in voce exsultationis:\n3\u00a0quoniam Dominus excelsus, terribilis,\n rex magnus super omnem terram.\n4\u00a0Subjecit populos nobis,\n et gentes sub pedibus nostris.\n5\u00a0Elegit nobis h\u00e6reditatem suam;\n speciem Jacob quam dilexit.\n6\u00a0Ascendit Deus in jubilo,\n et Dominus in voce tub\u00e6.\n7\u00a0Psallite Deo nostro, psallite;\n psallite regi nostro, psallite:\n8\u00a0quoniam rex omnis terr\u00e6 Deus,\n psallite sapienter.\n9\u00a0Regnabit Deus super gentes;\n Deus sedet super sedem sanctam suam.\n10\u00a0Principes populorum congregati sunt cum Deo Abraham,\n quoniam dii fortes terr\u00e6 vehementer elevati sunt.]","title":"Vulgate: Psalms: Psalms Chapter 46","type":"page"}