{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa047.htm","path":"bib/vul/psa047.htm","source_url":"https://sacred-texts.com/bib/vul/psa047.htm","text":"1 Psalmus cantici. Filiis Core, secunda sabbati.\n2\u00a0[Magnus Dominus et laudabilis nimis,\n in civitate Dei nostri, in monte sancto ejus.\n3\u00a0Fundatur exsultatione univers\u00e6 terr\u00e6 mons Sion;\n latera aquilonis, civitas regis magni.\n4\u00a0Deus in domibus ejus cognoscetur\n cum suscipiet eam.\n5\u00a0Quoniam ecce reges terr\u00e6 congregati sunt;\n convenerunt in unum.\n6\u00a0Ipsi videntes, sic admirati sunt,\n conturbati sunt, commoti sunt.\n7\u00a0Tremor apprehendit eos;\n ibi dolores ut parturientis:\n8\u00a0in spiritu vehementi conteres naves Tharsis.\n9\u00a0Sicut audivimus, sic vidimus,\n in civitate Domini virtutum, in civitate Dei nostri:\n Deus fundavit eam in \u00e6ternum.\n10\u00a0Suscepimus, Deus, misericordiam tuam\n in medio templi tui.\n11\u00a0Secundum nomen tuum, Deus,\n sic et laus tua in fines terr\u00e6;\n justitia plena est dextera tua.\n12\u00a0L\u00e6tetur mons Sion,\n et exsultent fili\u00e6 Jud\u00e6,\n propter judicia tua, Domine.\n13\u00a0Circumdate Sion, et complectimini eam;\n narrate in turribus ejus.\n14\u00a0Ponite corda vestra in virtute ejus,\n et distribuite domos ejus, ut enarretis in progenie altera.\n15\u00a0Quoniam hic est Deus,\n Deus noster in \u00e6ternum, et in s\u00e6culum s\u00e6culi:\n ipse reget nos in s\u00e6cula.]","title":"Vulgate: Psalms: Psalms Chapter 47","type":"page"}