{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa048.htm","path":"bib/vul/psa048.htm","source_url":"https://sacred-texts.com/bib/vul/psa048.htm","text":"1 In finem, filiis Core. Psalmus.\n2\u00a0[Audite h\u00e6c, omnes gentes;\n auribus percipite, omnes qui habitatis orbem:\n3\u00a0quique terrigen\u00e6 et filii hominum,\n simul in unum dives et pauper.\n4\u00a0Os meum loquetur sapientiam,\n et meditatio cordis mei prudentiam.\n5\u00a0Inclinabo in parabolam aurem meam;\n aperiam in psalterio propositionem meam.\n6\u00a0Cur timebo in die mala?\n iniquitas calcanei mei circumdabit me.\n7\u00a0Qui confidunt in virtute sua,\n et in multitudine divitiarum suarum, gloriantur.\n8\u00a0Frater non redimit, redimet homo:\n non dabit Deo placationem suam,\n9\u00a0et pretium redemptionis anim\u00e6 su\u00e6.\n Et laborabit in \u00e6ternum;\n10\u00a0et vivet adhuc in finem.\n11\u00a0Non videbit interitum,\n cum viderit sapientes morientes:\n simul insipiens et stultus peribunt.\n Et relinquent alienis divitias suas,\n12\u00a0et sepulchra eorum domus illorum in \u00e6ternum;\n tabernacula eorum in progenie et progenie:\n vocaverunt nomina sua in terris suis.\n13\u00a0Et homo, cum in honore esset, non intellexit.\n Comparatus est jumentis insipientibus,\n et similis factus est illis.\n14\u00a0H\u00e6c via illorum scandalum ipsis;\n et postea in ore suo complacebunt.\n15\u00a0Sicut oves in inferno positi sunt:\n mors depascet eos.\n Et dominabuntur eorum justi in matutino;\n et auxilium eorum veterascet in inferno a gloria eorum.\n16\u00a0Verumtamen Deus redimet animam meam de manu inferi,\n cum acceperit me.\n17\u00a0Ne timueris cum dives factus fuerit homo,\n et cum multiplicata fuerit gloria domus ejus:\n18\u00a0quoniam, cum interierit, non sumet omnia,\n neque descendet cum eo gloria ejus.\n19\u00a0Quia anima ejus in vita ipsius benedicetur;\n confitebitur tibi cum benefeceris ei.\n20\u00a0Introibit usque in progenies patrum suorum;\n et usque in \u00e6ternum non videbit lumen.\n21\u00a0Homo, cum in honore esset, non intellexit.\n Comparatus est jumentis insipientibus,\n et similis factus est illis.]","title":"Vulgate: Psalms: Psalms Chapter 48","type":"page"}