{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa050.htm","path":"bib/vul/psa050.htm","source_url":"https://sacred-texts.com/bib/vul/psa050.htm","text":"1 In finem. Psalmus David,\n2 cum venit ad eum Nathan propheta, quando intravit ad Bethsabee.\n3\u00a0[Miserere mei, Deus, secundum magnam misericordiam tuam;\n et secundum multitudinem miserationum tuarum, dele iniquitatem meam.\n4\u00a0Amplius lava me ab iniquitate mea,\n et a peccato meo munda me.\n5\u00a0Quoniam iniquitatem meam ego cognosco,\n et peccatum meum contra me est semper.\n6\u00a0Tibi soli peccavi, et malum coram te feci;\n ut justificeris in sermonibus tuis,\n et vincas cum judicaris.\n7\u00a0Ecce enim in iniquitatibus conceptus sum,\n et in peccatis concepit me mater mea.\n8\u00a0Ecce enim veritatem dilexisti;\n incerta et occulta sapienti\u00e6 tu\u00e6 manifestasti mihi.\n9\u00a0Asperges me hyssopo, et mundabor;\n lavabis me, et super nivem dealbabor.\n10\u00a0Auditui meo dabis gaudium et l\u00e6titiam,\n et exsultabunt ossa humiliata.\n11\u00a0Averte faciem tuam a peccatis meis,\n et omnes iniquitates meas dele.\n12\u00a0Cor mundum crea in me, Deus,\n et spiritum rectum innova in visceribus meis.\n13\u00a0Ne projicias me a facie tua,\n et spiritum sanctum tuum ne auferas a me.\n14\u00a0Redde mihi l\u00e6titiam salutaris tui,\n et spiritu principali confirma me.\n15\u00a0Docebo iniquos vias tuas,\n et impii ad te convertentur.\n16\u00a0Libera me de sanguinibus, Deus, Deus salutis me\u00e6,\n et exsultabit lingua mea justitiam tuam.\n17\u00a0Domine, labia mea aperies,\n et os meum annuntiabit laudem tuam.\n18\u00a0Quoniam si voluisses sacrificium, dedissem utique;\n holocaustis non delectaberis.\n19\u00a0Sacrificium Deo spiritus contribulatus;\n cor contritum et humiliatum, Deus, non despicies.\n20\u00a0Benigne fac, Domine, in bona voluntate tua Sion,\n ut \u00e6dificentur muri Jerusalem.\n21\u00a0Tunc acceptabis sacrificium justiti\u00e6, oblationes et holocausta;\n tunc imponent super altare tuum vitulos.]","title":"Vulgate: Psalms: Psalms Chapter 50","type":"page"}