{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa052.htm","path":"bib/vul/psa052.htm","source_url":"https://sacred-texts.com/bib/vul/psa052.htm","text":"1\u00a0In finem, pro Ma\u00ebleth intelligenti\u00e6 David. [Dixit insipiens in corde suo: Non est Deus.\n2\u00a0Corrupti sunt, et abominabiles facti sunt in iniquitatibus;\n non est qui faciat bonum.\n3\u00a0Deus de c\u00e6lo prospexit super filios hominum,\n ut videat si est intelligens, aut requirens Deum.\n4\u00a0Omnes declinaverunt; simul inutiles facti sunt:\n non est qui faciat bonum, non est usque ad unum.\n5\u00a0Nonne scient omnes qui operantur iniquitatem,\n qui devorant plebem meam ut cibum panis?\n6\u00a0Deum non invocaverunt;\n illic trepidaverunt timore, ubi non erat timor.\n Quoniam Deus dissipavit ossa eorum qui hominibus placent:\n confusi sunt, quoniam Deus sprevit eos.\n7\u00a0Quis dabit ex Sion salutare Isra\u00ebl?\n cum converterit Deus captivitatem plebis su\u00e6,\n exsultabit Jacob, et l\u00e6tabitur Isra\u00ebl.]","title":"Vulgate: Psalms: Psalms Chapter 52","type":"page"}