{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa053.htm","path":"bib/vul/psa053.htm","source_url":"https://sacred-texts.com/bib/vul/psa053.htm","text":"1 In finem, in carminibus. Intellectus David,\n2 cum venissent Ziph\u00e6i, et dixissent ad Saul: Nonne David absconditus est apud nos?\n3\u00a0[Deus, in nomine tuo salvum me fac,\n et in virtute tua judica me.\n4\u00a0Deus, exaudi orationem meam;\n auribus percipe verba oris mei.\n5\u00a0Quoniam alieni insurrexerunt adversum me,\n et fortes qu\u00e6sierunt animam meam,\n et non proposuerunt Deum ante conspectum suum.\n6\u00a0Ecce enim Deus adjuvat me,\n et Dominus susceptor est anim\u00e6 me\u00e6.\n7\u00a0Averte mala inimicis meis;\n et in veritate tua disperde illos.\n8\u00a0Voluntarie sacrificabo tibi,\n et confitebor nomini tuo, Domine, quoniam bonum est.\n9\u00a0Quoniam ex omni tribulatione eripuisti me,\n et super inimicos meos despexit oculus meus.]","title":"Vulgate: Psalms: Psalms Chapter 53","type":"page"}