{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa054.htm","path":"bib/vul/psa054.htm","source_url":"https://sacred-texts.com/bib/vul/psa054.htm","text":"1 In finem, in carminibus. Intellectus David.\n2\u00a0[Exaudi, Deus, orationem meam,\n et ne despexeris deprecationem meam:\n3\u00a0intende mihi, et exaudi me.\n Contristatus sum in exercitatione mea,\n et conturbatus sum\n4\u00a0a voce inimici, et a tribulatione peccatoris.\n Quoniam declinaverunt in me iniquitates,\n et in ira molesti erant mihi.\n5\u00a0Cor meum conturbatum est in me,\n et formido mortis cecidit super me.\n6\u00a0Timor et tremor venerunt super me,\n et contexerunt me tenebr\u00e6.\n7\u00a0Et dixi: Quis dabit mihi pennas sicut columb\u00e6,\n et volabo, et requiescam?\n8\u00a0Ecce elongavi fugiens,\n et mansi in solitudine.\n9\u00a0Exspectabam eum qui salvum me fecit\n a pusillanimitate spiritus, et tempestate.\n10\u00a0Pr\u00e6cipita, Domine; divide linguas eorum:\n quoniam vidi iniquitatem et contradictionem in civitate.\n11\u00a0Die ac nocte circumdabit eam super muros ejus iniquitas;\n et labor in medio ejus,\n12\u00a0et injustitia:\n et non defecit de plateis ejus usura et dolus.\n13\u00a0Quoniam si inimicus meus maledixisset mihi,\n sustinuissem utique.\n Et si is qui oderat me super me magna locutus fuisset,\n abscondissem me forsitan ab eo.\n14\u00a0Tu vero homo unanimis,\n dux meus, et notus meus:\n15\u00a0qui simul mecum dulces capiebas cibos;\n in domo Dei ambulavimus cum consensu.\n16\u00a0Veniat mors super illos,\n et descendant in infernum viventes:\n quoniam nequiti\u00e6 in habitaculis eorum, in medio eorum.\n17\u00a0Ego autem ad Deum clamavi,\n et Dominus salvabit me.\n18\u00a0Vespere, et mane, et meridie, narrabo, et annuntiabo;\n et exaudiet vocem meam.\n19\u00a0Redimet in pace animam meam ab his qui appropinquant mihi:\n quoniam inter multos erant mecum.\n20\u00a0Exaudiet Deus, et humiliabit illos,\n qui est ante s\u00e6cula.\n Non enim est illis commutatio,\n et non timuerunt Deum.\n21\u00a0Extendit manum suam in retribuendo;\n contaminaverunt testamentum ejus:\n22\u00a0divisi sunt ab ira vultus ejus,\n et appropinquavit cor illius.\n Molliti sunt sermones ejus super oleum;\n et ipsi sunt jacula.\n23\u00a0Jacta super Dominum curam tuam, et ipse te enutriet;\n non dabit in \u00e6ternum fluctuationem justo.\n24\u00a0Tu vero, Deus, deduces eos in puteum interitus.\n Viri sanguinum et dolosi non dimidiabunt dies suos;\n ego autem sperabo in te, Domine.]","title":"Vulgate: Psalms: Psalms Chapter 54","type":"page"}