{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa055.htm","path":"bib/vul/psa055.htm","source_url":"https://sacred-texts.com/bib/vul/psa055.htm","text":"1 In finem, pro populo qui a sanctis longe factus est. David in tituli inscriptionem, cum tenuerunt eum Allophyli in Geth.\n2\u00a0[Miserere mei, Deus, quoniam conculcavit me homo;\n tota die impugnans, tribulavit me.\n3\u00a0Conculcaverunt me inimici mei tota die,\n quoniam multi bellantes adversum me.\n4\u00a0Ab altitudine diei timebo:\n ego vero in te sperabo.\n5\u00a0In Deo laudabo sermones meos;\n in Deo speravi:\n non timebo quid faciat mihi caro.\n6\u00a0Tota die verba mea execrabantur;\n adversum me omnes cogitationes eorum in malum.\n7\u00a0Inhabitabunt, et abscondent;\n ipsi calcaneum meum observabunt.\n Sicut sustinuerunt animam meam,\n8\u00a0pro nihilo salvos facies illos;\n in ira populos confringes.\n9\u00a0Deus, vitam meam annuntiavi tibi;\n posuisti lacrimas meas in conspectu tuo,\n sicut et in promissione tua:\n10\u00a0tunc convertentur inimici mei retrorsum.\n In quacumque die invocavero te,\n ecce cognovi quoniam Deus meus es.\n11\u00a0In Deo laudabo verbum;\n in Domino laudabo sermonem.\n In Deo speravi:\n non timebo quid faciat mihi homo.\n12\u00a0In me sunt, Deus, vota tua,\n qu\u00e6 reddam, laudationes tibi:\n13\u00a0quoniam eripuisti animam meam de morte,\n et pedes meos de lapsu,\n ut placeam coram Deo in lumine viventium.]","title":"Vulgate: Psalms: Psalms Chapter 55","type":"page"}