{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa056.htm","path":"bib/vul/psa056.htm","source_url":"https://sacred-texts.com/bib/vul/psa056.htm","text":"1 In finem, ne disperdas. David in tituli inscriptionem, cum fugeret a facie Saul in speluncam.\n2\u00a0[Miserere mei, Deus, miserere mei,\n quoniam in te confidit anima mea.\n Et in umbra alarum tuarum sperabo,\n donec transeat iniquitas.\n3\u00a0Clamabo ad Deum altissimum,\n Deum qui benefecit mihi.\n4\u00a0Misit de c\u00e6lo, et liberavit me;\n dedit in opprobrium conculcantes me.\n Misit Deus misericordiam suam et veritatem suam,\n5\u00a0et eripuit animam meam de medio catulorum leonum.\n Dormivi conturbatus.\n Filii hominum dentes eorum arma et sagitt\u00e6,\n et lingua eorum gladius acutus.\n6\u00a0Exaltare super c\u00e6los, Deus,\n et in omnem terram gloria tua.\n7\u00a0Laqueum paraverunt pedibus meis,\n et incurvaverunt animam meam.\n Foderunt ante faciem meam foveam,\n et inciderunt in eam.\n8\u00a0Paratum cor meum, Deus, paratum cor meum;\n cantabo, et psalmum dicam.\n9\u00a0Exsurge, gloria mea;\n exsurge, psalterium et cithara:\n exsurgam diluculo.\n10\u00a0Confitebor tibi in populis, Domine,\n et psalmum dicam tibi in gentibus:\n11\u00a0quoniam magnificata est usque ad c\u00e6los misericordia tua,\n et usque ad nubes veritas tua.\n12\u00a0Exaltare super c\u00e6los, Deus,\n et super omnem terram gloria tua.]","title":"Vulgate: Psalms: Psalms Chapter 56","type":"page"}