{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa057.htm","path":"bib/vul/psa057.htm","source_url":"https://sacred-texts.com/bib/vul/psa057.htm","text":"1 In finem, ne disperdas. David in tituli inscriptionem.\n2\u00a0[Si vere utique justitiam loquimini,\n recta judicate, filii hominum.\n3\u00a0Etenim in corde iniquitates operamini;\n in terra injustitias manus vestr\u00e6 concinnant.\n4\u00a0Alienati sunt peccatores a vulva;\n erraverunt ab utero:\n locuti sunt falsa.\n5\u00a0Furor illis secundum similitudinem serpentis,\n sicut aspidis surd\u00e6 et obturantis aures suas,\n6\u00a0qu\u00e6 non exaudiet vocem incantantium,\n et venefici incantantis sapienter.\n7\u00a0Deus conteret dentes eorum in ore ipsorum;\n molas leonum confringet Dominus.\n8\u00a0Ad nihilum devenient tamquam aqua decurrens;\n intendit arcum suum donec infirmentur.\n9\u00a0Sicut cera qu\u00e6 fluit auferentur;\n supercecidit ignis, et non viderunt solem.\n10\u00a0Priusquam intelligerent spin\u00e6 vestr\u00e6 rhamnum,\n sicut viventes sic in ira absorbet eos.\n11\u00a0L\u00e6tabitur justus cum viderit vindictam;\n manus suas lavabit in sanguine peccatoris.\n12\u00a0Et dicet homo: Si utique est fructus justo,\n utique est Deus judicans eos in terra.]","title":"Vulgate: Psalms: Psalms Chapter 57","type":"page"}