{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa058.htm","path":"bib/vul/psa058.htm","source_url":"https://sacred-texts.com/bib/vul/psa058.htm","text":"1 In finem, ne disperdas. David in tituli inscriptionem, quando misit Saul et custodivit domum ejus ut eum interficeret.\n2\u00a0[Eripe me de inimicis meis, Deus meus,\n et ab insurgentibus in me libera me.\n3\u00a0Eripe me de operantibus iniquitatem,\n et de viris sanguinum salva me.\n4\u00a0Quia ecce ceperunt animam meam;\n irruerunt in me fortes.\n5\u00a0Neque iniquitas mea, neque peccatum meum, Domine;\n sine iniquitate cucurri, et direxi.\n6\u00a0Exsurge in occursum meum, et vide:\n et tu, Domine Deus virtutum, Deus Isra\u00ebl,\n intende ad visitandas omnes gentes:\n non miserearis omnibus qui operantur iniquitatem.\n7\u00a0Convertentur ad vesperam, et famem patientur ut canes:\n et circuibunt civitatem.\n8\u00a0Ecce loquentur in ore suo,\n et gladius in labiis eorum: quoniam quis audivit?\n9\u00a0Et tu, Domine, deridebis eos;\n ad nihilum deduces omnes gentes.\n10\u00a0Fortitudinem meam ad te custodiam,\n quia, Deus, susceptor meus es:\n11\u00a0Deus meus misericordia ejus pr\u00e6veniet me.\n12\u00a0Deus ostendet mihi super inimicos meos:\n ne occidas eos, nequando obliviscantur populi mei.\n Disperge illos in virtute tua,\n et depone eos, protector meus, Domine:\n13\u00a0delictum oris eorum, sermonem labiorum ipsorum;\n et comprehendantur in superbia sua.\n Et de execratione et mendacio annuntiabuntur\n14\u00a0in consummatione:\n in ira consummationis, et non erunt.\n Et scient quia Deus dominabitur Jacob, et finium terr\u00e6.\n15\u00a0Convertentur ad vesperam, et famem patientur ut canes:\n et circuibunt civitatem.\n16\u00a0Ipsi dispergentur ad manducandum;\n si vero non fuerint saturati, et murmurabunt.\n17\u00a0Ego autem cantabo fortitudinem tuam,\n et exsultabo mane misericordiam tuam:\n quia factus es susceptor meus,\n et refugium meum in die tribulationis me\u00e6.\n18\u00a0Adjutor meus, tibi psallam,\n quia Deus susceptor meus es;\n Deus meus, misericordia mea.]","title":"Vulgate: Psalms: Psalms Chapter 58","type":"page"}