{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa059.htm","path":"bib/vul/psa059.htm","source_url":"https://sacred-texts.com/bib/vul/psa059.htm","text":"1 In finem, pro his qui immutabuntur, in tituli inscriptionem ipsi David, in doctrinam,\n2 cum succendit Mesopotamiam Syri\u00e6 et Sobal, et convertit Joab, et percussit Idum\u00e6am in valle Salinarum duodecim millia.\n3\u00a0[Deus, repulisti nos, et destruxisti nos;\n iratus es, et misertus es nobis.\n4\u00a0Commovisti terram, et conturbasti eam;\n sana contritiones ejus, quia commota est.\n5\u00a0Ostendisti populo tuo dura;\n potasti nos vino compunctionis.\n6\u00a0Dedisti metuentibus te significationem,\n ut fugiant a facie arcus;\n ut liberentur dilecti tui.\n7\u00a0Salvum fac dextera tua, et exaudi me.\n8\u00a0Deus locutus est in sancto suo:\n l\u00e6tabor, et partibor Sichimam;\n et convallem tabernaculorum metibor.\n9\u00a0Meus est Galaad, et meus est Manasses;\n et Ephraim fortitudo capitis mei.\n Juda rex meus;\n10\u00a0Moab olla spei me\u00e6.\n In Idum\u00e6am extendam calceamentum meum:\n mihi alienigen\u00e6 subditi sunt.\n11\u00a0Quis deducet me in civitatem munitam?\n quis deducet me usque in Idum\u00e6am?\n12\u00a0nonne tu, Deus, qui repulisti nos?\n et non egredieris, Deus, in virtutibus nostris?\n13\u00a0Da nobis auxilium de tribulatione,\n quia vana salus hominis.\n14\u00a0In Deo faciemus virtutem;\n et ipse ad nihilum deducet tribulantes nos.]","title":"Vulgate: Psalms: Psalms Chapter 59","type":"page"}