{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa060.htm","path":"bib/vul/psa060.htm","source_url":"https://sacred-texts.com/bib/vul/psa060.htm","text":"1 In finem. In hymnis David.\n2\u00a0[Exaudi, Deus, deprecationem meam;\n intende orationi me\u00e6.\n3\u00a0A finibus terr\u00e6 ad te clamavi, dum anxiaretur cor meum;\n in petra exaltasti me.\n Deduxisti me,\n4\u00a0quia factus es spes mea:\n turris fortitudinis a facie inimici.\n5\u00a0Inhabitabo in tabernaculo tuo in s\u00e6cula;\n protegar in velamento alarum tuarum.\n6\u00a0Quoniam tu, Deus meus, exaudisti orationem meam;\n dedisti h\u00e6reditatem timentibus nomen tuum.\n7\u00a0Dies super dies regis adjicies;\n annos ejus usque in diem generationis et generationis.\n8\u00a0Permanet in \u00e6ternum in conspectu Dei:\n misericordiam et veritatem ejus quis requiret?\n9\u00a0Sic psalmum dicam nomini tuo in s\u00e6culum s\u00e6culi,\n ut reddam vota mea de die in diem.]","title":"Vulgate: Psalms: Psalms Chapter 60","type":"page"}