{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa061.htm","path":"bib/vul/psa061.htm","source_url":"https://sacred-texts.com/bib/vul/psa061.htm","text":"1 In finem, pro Idithun. Psalmus David.\n2\u00a0[Nonne Deo subjecta erit anima mea?\n ab ipso enim salutare meum.\n3\u00a0Nam et ipse Deus meus et salutaris meus;\n susceptor meus, non movebor amplius.\n4\u00a0Quousque irruitis in hominem?\n interficitis universi vos,\n tamquam parieti inclinato et maceri\u00e6 depuls\u00e6.\n5\u00a0Verumtamen pretium meum cogitaverunt repellere;\n cucurri in siti:\n ore suo benedicebant,\n et corde suo maledicebant.\n6\u00a0Verumtamen Deo subjecta esto, anima mea,\n quoniam ab ipso patientia mea:\n7\u00a0quia ipse Deus meus et salvator meus,\n adjutor meus, non emigrabo.\n8\u00a0In Deo salutare meum et gloria mea;\n Deus auxilii mei, et spes mea in Deo est.\n9\u00a0Sperate in eo, omnis congregatio populi;\n effundite coram illo corda vestra:\n Deus adjutor noster in \u00e6ternum.\n10\u00a0Verumtamen vani filii hominum,\n mendaces filii hominum in stateris,\n ut decipiant ipsi de vanitate in idipsum.\n11\u00a0Nolite sperare in iniquitate,\n et rapinas nolite concupiscere;\n diviti\u00e6 si affluant, nolite cor apponere.\n12\u00a0Semel locutus est Deus;\n duo h\u00e6c audivi:\n quia potestas Dei est,\n13\u00a0et tibi, Domine, misericordia:\n quia tu reddes unicuique juxta opera sua.]","title":"Vulgate: Psalms: Psalms Chapter 61","type":"page"}