{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa062.htm","path":"bib/vul/psa062.htm","source_url":"https://sacred-texts.com/bib/vul/psa062.htm","text":"1 Psalmus David, cum esset in deserto Idum\u00e6\u00e6.\n2\u00a0[Deus, Deus meus, ad te de luce vigilo.\n Sitivit in te anima mea; quam multipliciter tibi caro mea!\n3\u00a0In terra deserta, et invia, et inaquosa,\n sic in sancto apparui tibi,\n ut viderem virtutem tuam et gloriam tuam.\n4\u00a0Quoniam melior est misericordia tua super vitas,\n labia mea laudabunt te.\n5\u00a0Sic benedicam te in vita mea,\n et in nomine tuo levabo manus meas.\n6\u00a0Sicut adipe et pinguedine repleatur anima mea,\n et labiis exsultationis laudabit os meum.\n7\u00a0Si memor fui tui super stratum meum,\n in matutinis meditabor in te.\n8\u00a0Quia fuisti adjutor meus,\n et in velamento alarum tuarum exsultabo.\n9\u00a0Adh\u00e6sit anima mea post te;\n me suscepit dextera tua.\n10\u00a0Ipsi vero in vanum qu\u00e6sierunt animam meam:\n introibunt in inferiora terr\u00e6;\n11\u00a0tradentur in manus gladii:\n partes vulpium erunt.\n12\u00a0Rex vero l\u00e6tabitur in Deo;\n laudabuntur omnes qui jurant in eo:\n quia obstructum est os loquentium iniqua.]","title":"Vulgate: Psalms: Psalms Chapter 62","type":"page"}