{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa063.htm","path":"bib/vul/psa063.htm","source_url":"https://sacred-texts.com/bib/vul/psa063.htm","text":"1 In finem. Psalmus David.\n2\u00a0[Exaudi, Deus, orationem meam cum deprecor;\n a timore inimici eripe animam meam.\n3\u00a0Protexisti me a conventu malignantium,\n a multitudine operantium iniquitatem.\n4\u00a0Quia exacuerunt ut gladium linguas suas;\n intenderunt arcum rem amaram,\n5\u00a0ut sagittent in occultis immaculatum.\n6\u00a0Subito sagittabunt eum, et non timebunt;\n firmaverunt sibi sermonem nequam.\n Narraverunt ut absconderent laqueos;\n dixerunt: Quis videbit eos?\n7\u00a0Scrutati sunt iniquitates;\n defecerunt scrutantes scrutinio.\n Accedet homo ad cor altum,\n8\u00a0et exaltabitur Deus.\n Sagitt\u00e6 parvulorum fact\u00e6 sunt plag\u00e6 eorum,\n9\u00a0et infirmat\u00e6 sunt contra eos lingu\u00e6 eorum.\n Conturbati sunt omnes qui videbant eos,\n10\u00a0et timuit omnis homo.\n Et annuntiaverunt opera Dei,\n et facta ejus intellexerunt.\n11\u00a0L\u00e6tabitur justus in Domino, et sperabit in eo,\n et laudabuntur omnes recti corde.]","title":"Vulgate: Psalms: Psalms Chapter 63","type":"page"}