{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa064.htm","path":"bib/vul/psa064.htm","source_url":"https://sacred-texts.com/bib/vul/psa064.htm","text":"1 In finem. Psalmus David, canticum Jeremi\u00e6 et Ezechielis populo transmigrationis, cum inciperent exire.\n2\u00a0[Te decet hymnus, Deus, in Sion,\n et tibi reddetur votum in Jerusalem.\n3\u00a0Exaudi orationem meam;\n ad te omnis caro veniet.\n4\u00a0Verba iniquorum pr\u00e6valuerunt super nos,\n et impietatibus nostris tu propitiaberis.\n5\u00a0Beatus quem elegisti et assumpsisti:\n inhabitabit in atriis tuis.\n Replebimur in bonis domus tu\u00e6;\n sanctum est templum tuum,\n6\u00a0mirabile in \u00e6quitate.\n Exaudi nos, Deus, salutaris noster,\n spes omnium finium terr\u00e6, et in mari longe.\n7\u00a0Pr\u00e6parans montes in virtute tua,\n accinctus potentia;\n8\u00a0qui conturbas profundum maris,\n sonum fluctuum ejus.\n Turbabuntur gentes,\n9\u00a0et timebunt qui habitant terminos a signis tuis;\n exitus matutini et vespere delectabis.\n10\u00a0Visitasti terram, et inebriasti eam;\n multiplicasti locupletare eam.\n Flumen Dei repletum est aquis; parasti cibum illorum:\n quoniam ita est pr\u00e6paratio ejus.\n11\u00a0Rivos ejus inebria;\n multiplica genimina ejus:\n in stillicidiis ejus l\u00e6tabitur germinans.\n12\u00a0Benedices coron\u00e6 anni benignitatis tu\u00e6,\n et campi tui replebuntur ubertate.\n13\u00a0Pinguescent speciosa deserti,\n et exsultatione colles accingentur.\n14\u00a0Induti sunt arietes ovium,\n et valles abundabunt frumento;\n clamabunt, etenim hymnum dicent.]","title":"Vulgate: Psalms: Psalms Chapter 64","type":"page"}