{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa065.htm","path":"bib/vul/psa065.htm","source_url":"https://sacred-texts.com/bib/vul/psa065.htm","text":"1\u00a0In finem. Canticum psalmi resurrectionis. [Jubilate Deo, omnis terra;\n2\u00a0psalmum dicite nomini ejus;\n date gloriam laudi ejus.\n3\u00a0Dicite Deo: Quam terribilia sunt opera tua, Domine!\n in multitudine virtutis tu\u00e6 mentientur tibi inimici tui.\n4\u00a0Omnis terra adoret te, et psallat tibi;\n psalmum dicat nomini tuo.\n5\u00a0Venite, et videte opera Dei:\n terribilis in consiliis super filios hominum.\n6\u00a0Qui convertit mare in aridam;\n in flumine pertransibunt pede:\n ibi l\u00e6tabimur in ipso.\n7\u00a0Qui dominatur in virtute sua in \u00e6ternum;\n oculi ejus super gentes respiciunt:\n qui exasperant non exaltentur in semetipsis.\n8\u00a0Benedicite, gentes, Deum nostrum,\n et auditam facite vocem laudis ejus:\n9\u00a0qui posuit animam meam ad vitam,\n et non dedit in commotionem pedes meos.\n10\u00a0Quoniam probasti nos, Deus;\n igne nos examinasti, sicut examinatur argentum.\n11\u00a0Induxisti nos in laqueum;\n posuisti tribulationes in dorso nostro;\n12\u00a0imposuisti homines super capita nostra.\n Transivimus per ignem et aquam,\n et eduxisti nos in refrigerium.\n13\u00a0Introibo in domum tuam in holocaustis;\n reddam tibi vota mea\n14\u00a0qu\u00e6 distinxerunt labia mea:\n et locutum est os meum in tribulatione mea.\n15\u00a0Holocausta medullata offeram tibi, cum incenso arietum;\n offeram tibi boves cum hircis.\n16\u00a0Venite, audite, et narrabo, omnes qui timetis Deum,\n quanta fecit anim\u00e6 me\u00e6.\n17\u00a0Ad ipsum ore meo clamavi,\n et exaltavi sub lingua mea.\n18\u00a0Iniquitatem si aspexi in corde meo,\n non exaudiet Dominus.\n19\u00a0Propterea exaudivit Deus,\n et attendit voci deprecationis me\u00e6.\n20\u00a0Benedictus Deus, qui non amovit orationem meam,\n et misericordiam suam a me.]","title":"Vulgate: Psalms: Psalms Chapter 65","type":"page"}