{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa067.htm","path":"bib/vul/psa067.htm","source_url":"https://sacred-texts.com/bib/vul/psa067.htm","text":"1 In finem. Psalmus cantici ipsi David.\n2\u00a0[Exsurgat Deus, et dissipentur inimici ejus;\n et fugiant qui oderunt eum a facie ejus.\n3\u00a0Sicut deficit fumus, deficiant;\n sicut fluit cera a facie ignis, sic pereant peccatores a facie Dei.\n4\u00a0Et justi epulentur, et exsultent in conspectu Dei,\n et delectentur in l\u00e6titia.\n5\u00a0Cantate Deo; psalmum dicite nomini ejus:\n iter facite ei qui ascendit super occasum.\n Dominus nomen illi; exsultate in conspectu ejus.\n Turbabuntur a facie ejus,\n6\u00a0patris orphanorum, et judicis viduarum;\n Deus in loco sancto suo.\n7\u00a0Deus qui inhabitare facit unius moris in domo;\n qui educit vinctos in fortitudine,\n similiter eos qui exasperant, qui habitant in sepulchris.\n8\u00a0Deus, cum egredereris in conspectu populi tui,\n cum pertransires in deserto,\n9\u00a0terra mota est, etenim c\u00e6li distillaverunt,\n a facie Dei Sinai, a facie Dei Isra\u00ebl.\n10\u00a0Pluviam voluntariam segregabis, Deus, h\u00e6reditati tu\u00e6;\n et infirmata est, tu vero perfecisti eam.\n11\u00a0Animalia tua habitabunt in ea;\n parasti in dulcedine tua pauperi, Deus.\n12\u00a0Dominus dabit verbum evangelizantibus, virtute multa.\n13\u00a0Rex virtutum dilecti, dilecti;\n et speciei domus dividere spolia.\n14\u00a0Si dormiatis inter medios cleros,\n penn\u00e6 columb\u00e6 deargentat\u00e6,\n et posteriora dorsi ejus in pallore auri.\n15\u00a0Dum discernit c\u00e6lestis reges super eam,\n nive dealbabuntur in Selmon.\n16\u00a0Mons Dei, mons pinguis:\n mons coagulatus, mons pinguis.\n17\u00a0Ut quid suspicamini, montes coagulatos?\n mons in quo beneplacitum est Deo habitare in eo;\n etenim Dominus habitabit in finem.\n18\u00a0Currus Dei decem millibus multiplex, millia l\u00e6tantium;\n Dominus in eis in Sina, in sancto.\n19\u00a0Ascendisti in altum, cepisti captivitatem,\n accepisti dona in hominibus;\n etenim non credentes inhabitare Dominum Deum.\n20\u00a0Benedictus Dominus die quotidie:\n prosperum iter faciet nobis Deus salutarium nostrorum.\n21\u00a0Deus noster, Deus salvos faciendi;\n et Domini, Domini exitus mortis.\n22\u00a0Verumtamen Deus confringet capita inimicorum suorum,\n verticem capilli perambulantium in delictis suis.\n23\u00a0Dixit Dominus: Ex Basan convertam,\n convertam in profundum maris:\n24\u00a0ut intingatur pes tuus in sanguine;\n lingua canum tuorum ex inimicis, ab ipso.\n25\u00a0Viderunt ingressus tuos, Deus,\n ingressus Dei mei, regis mei, qui est in sancto.\n26\u00a0Pr\u00e6venerunt principes conjuncti psallentibus,\n in medio juvencularum tympanistriarum.\n27\u00a0In ecclesiis benedicite Deo Domino de fontibus Isra\u00ebl.\n28\u00a0Ibi Benjamin adolescentulus, in mentis excessu;\n principes Juda, duces eorum;\n principes Zabulon, principes Nephthali.\n29\u00a0Manda, Deus, virtuti tu\u00e6;\n confirma hoc, Deus, quod operatus es in nobis.\n30\u00a0A templo tuo in Jerusalem,\n tibi offerent reges munera.\n31\u00a0Increpa feras arundinis;\n congregatio taurorum in vaccis populorum:\n ut excludant eos qui probati sunt argento.\n Dissipa gentes qu\u00e6 bella volunt.\n32\u00a0Venient legati ex \u00c6gypto;\n \u00c6thiopia pr\u00e6veniet manus ejus Deo.\n33\u00a0Regna terr\u00e6, cantate Deo;\n psallite Domino; psallite Deo.\n34\u00a0Qui ascendit super c\u00e6lum c\u00e6li, ad orientem:\n ecce dabit voci su\u00e6 vocem virtutis.\n35\u00a0Date gloriam Deo super Isra\u00ebl;\n magnificentia ejus et virtus ejus in nubibus.\n36\u00a0Mirabilis Deus in sanctis suis;\n Deus Isra\u00ebl ipse dabit virtutem et fortitudinem plebi su\u00e6.\n Benedictus Deus!]","title":"Vulgate: Psalms: Psalms Chapter 67","type":"page"}