{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa068.htm","path":"bib/vul/psa068.htm","source_url":"https://sacred-texts.com/bib/vul/psa068.htm","text":"1 In finem, pro iis qui commutabuntur. David.\n2\u00a0[Salvum me fac, Deus,\n quoniam intraverunt aqu\u00e6 usque ad animam meam.\n3\u00a0Infixus sum in limo profundi et non est substantia.\n Veni in altitudinem maris, et tempestas demersit me.\n4\u00a0Laboravi clamans, rauc\u00e6 fact\u00e6 sunt fauces me\u00e6;\n defecerunt oculi mei, dum spero in Deum meum.\n5\u00a0Multiplicati sunt super capillos capitis mei\n qui oderunt me gratis.\n Confortati sunt qui persecuti sunt me\n inimici mei injuste;\n qu\u00e6 non rapui, tunc exsolvebam.\n6\u00a0Deus, tu scis insipientiam meam;\n et delicta mea a te non sunt abscondita.\n7\u00a0Non erubescant in me qui exspectant te, Domine, Domine virtutum;\n non confundantur super me qui qu\u00e6runt te, Deus Isra\u00ebl.\n8\u00a0Quoniam propter te sustinui opprobrium;\n operuit confusio faciem meam.\n9\u00a0Extraneus factus sum fratribus meis,\n et peregrinus filiis matris me\u00e6.\n10\u00a0Quoniam zelus domus tu\u00e6 comedit me,\n et opprobria exprobrantium tibi ceciderunt super me.\n11\u00a0Et operui in jejunio animam meam,\n et factum est in opprobrium mihi.\n12\u00a0Et posui vestimentum meum cilicium;\n et factus sum illis in parabolam.\n13\u00a0Adversum me loquebantur qui sedebant in porta,\n et in me psallebant qui bibebant vinum.\n14\u00a0Ego vero orationem meam ad te, Domine;\n tempus beneplaciti, Deus.\n In multitudine misericordi\u00e6 tu\u00e6,\n exaudi me in veritate salutis tu\u00e6.\n15\u00a0Eripe me de luto, ut non infigar;\n libera me ab iis qui oderunt me, et de profundis aquarum.\n16\u00a0Non me demergat tempestas aqu\u00e6,\n neque absorbeat me profundum,\n neque urgeat super me puteus os suum.\n17\u00a0Exaudi me, Domine, quoniam benigna est misericordia tua;\n secundum multitudinem miserationum tuarum respice in me.\n18\u00a0Et ne avertas faciem tuam a puero tuo;\n quoniam tribulor, velociter exaudi me.\n19\u00a0Intende anim\u00e6 me\u00e6, et libera eam;\n propter inimicos meos, eripe me.\n20\u00a0Tu scis improperium meum, et confusionem meam, et reverentiam meam;\n21\u00a0in conspectu tuo sunt omnes qui tribulant me.\n Improperium exspectavit cor meum et miseriam:\n et sustinui qui simul contristaretur, et non fuit;\n et qui consolaretur, et non inveni.\n22\u00a0Et dederunt in escam meam fel,\n et in siti mea potaverunt me aceto.\n23\u00a0Fiat mensa eorum coram ipsis in laqueum,\n et in retributiones, et in scandalum.\n24\u00a0Obscurentur oculi eorum, ne videant,\n et dorsum eorum semper incurva.\n25\u00a0Effunde super eos iram tuam,\n et furor ir\u00e6 tu\u00e6 comprehendat eos.\n26\u00a0Fiat habitatio eorum deserta,\n et in tabernaculis eorum non sit qui inhabitet.\n27\u00a0Quoniam quem tu percussisti persecuti sunt,\n et super dolorem vulnerum meorum addiderunt.\n28\u00a0Appone iniquitatem super iniquitatem eorum,\n et non intrent in justitiam tuam.\n29\u00a0Deleantur de libro viventium,\n et cum justis non scribantur.\n30\u00a0Ego sum pauper et dolens;\n salus tua, Deus, suscepit me.\n31\u00a0Laudabo nomen Dei cum cantico,\n et magnificabo eum in laude:\n32\u00a0et placebit Deo super vitulum novellum,\n cornua producentem et ungulas.\n33\u00a0Videant pauperes, et l\u00e6tentur;\n qu\u00e6rite Deum, et vivet anima vestra:\n34\u00a0quoniam exaudivit pauperes Dominus,\n et vinctos suos non despexit.\n35\u00a0Laudent illum c\u00e6li et terra;\n mare, et omnia reptilia in eis.\n36\u00a0Quoniam Deus salvam faciet Sion,\n et \u00e6dificabuntur civitates Juda,\n et inhabitabunt ibi, et h\u00e6reditate acquirent eam.\n37\u00a0Et semen servorum ejus possidebit eam;\n et qui diligunt nomen ejus habitabunt in ea.]","title":"Vulgate: Psalms: Psalms Chapter 68","type":"page"}