{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa070.htm","path":"bib/vul/psa070.htm","source_url":"https://sacred-texts.com/bib/vul/psa070.htm","text":"1\u00a0Psalmus David, filiorum Jonadab, et priorum captivorum. [In te, Domine, speravi; non confundar in \u00e6ternum.\n2\u00a0In justitia tua libera me, et eripe me:\n inclina ad me aurem tuam, et salva me.\n3\u00a0Esto mihi in Deum protectorem,\n et in locum munitum, ut salvum me facias:\n quoniam firmamentum meum et refugium meum es tu.\n4\u00a0Deus meus, eripe me de manu peccatoris,\n et de manu contra legem agentis, et iniqui:\n5\u00a0quoniam tu es patientia mea, Domine;\n Domine, spes mea a juventute mea.\n6\u00a0In te confirmatus sum ex utero;\n de ventre matris me\u00e6 tu es protector meus;\n in te cantatio mea semper.\n7\u00a0Tamquam prodigium factus sum multis;\n et tu adjutor fortis.\n8\u00a0Repleatur os meum laude,\n ut cantem gloriam tuam,\n tota die magnitudinem tuam.\n9\u00a0Ne projicias me in tempore senectutis;\n cum defecerit virtus mea, ne derelinquas me.\n10\u00a0Quia dixerunt inimici mei mihi,\n et qui custodiebant animam meam consilium fecerunt in unum,\n11\u00a0dicentes: Deus dereliquit eum:\n persequimini et comprehendite eum,\n quia non est qui eripiat.\n12\u00a0Deus, ne elongeris a me;\n Deus meus, in auxilium meum respice.\n13\u00a0Confundantur et deficiant detrahentes anim\u00e6 me\u00e6;\n operiantur confusione et pudore qui qu\u00e6runt mala mihi.\n14\u00a0Ego autem semper sperabo,\n et adjiciam super omnem laudem tuam.\n15\u00a0Os meum annuntiabit justitiam tuam,\n tota die salutare tuum.\n Quoniam non cognovi litteraturam,\n16\u00a0introibo in potentias Domini;\n Domine, memorabor justiti\u00e6 tu\u00e6 solius.\n17\u00a0Deus, docuisti me a juventute mea;\n et usque nunc pronuntiabo mirabilia tua.\n18\u00a0Et usque in senectam et senium,\n Deus, ne derelinquas me,\n donec annuntiem brachium tuum generationi omni qu\u00e6 ventura est,\n potentiam tuam,\n19\u00a0et justitiam tuam, Deus, usque in altissima;\n qu\u00e6 fecisti magnalia, Deus: quis similis tibi?\n20\u00a0Quantas ostendisti mihi tribulationes multas et malas!\n et conversus vivificasti me,\n et de abyssis terr\u00e6 iterum reduxisti me.\n21\u00a0Multiplicasti magnificentiam tuam;\n et conversus consolatus es me.\n22\u00a0Nam et ego confitebor tibi in vasis psalmi veritatem tuam, Deus;\n psallam tibi in cithara, sanctus Isra\u00ebl.\n23\u00a0Exsultabunt labia mea cum cantavero tibi;\n et anima mea quam redemisti.\n24\u00a0Sed et lingua mea tota die meditabitur justitiam tuam,\n cum confusi et reveriti fuerint qui qu\u00e6runt mala mihi.]","title":"Vulgate: Psalms: Psalms Chapter 70","type":"page"}