{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa071.htm","path":"bib/vul/psa071.htm","source_url":"https://sacred-texts.com/bib/vul/psa071.htm","text":"1 Psalmus, in Salomonem.\n2\u00a0[Deus, judicium tuum regi da,\n et justitiam tuam filio regis;\n judicare populum tuum in justitia,\n et pauperes tuos in judicio.\n3\u00a0Suscipiant montes pacem populo,\n et colles justitiam.\n4\u00a0Judicabit pauperes populi,\n et salvos faciet filios pauperum,\n et humiliabit calumniatorem.\n5\u00a0Et permanebit cum sole, et ante lunam,\n in generatione et generationem.\n6\u00a0Descendet sicut pluvia in vellus,\n et sicut stillicidia stillantia super terram.\n7\u00a0Orietur in diebus ejus justitia, et abundantia pacis,\n donec auferatur luna.\n8\u00a0Et dominabitur a mari usque ad mare,\n et a flumine usque ad terminos orbis terrarum.\n9\u00a0Coram illo procident \u00c6thiopes,\n et inimici ejus terram lingent.\n10\u00a0Reges Tharsis et insul\u00e6 munera offerent;\n reges Arabum et Saba dona adducent:\n11\u00a0et adorabunt eum omnes reges terr\u00e6;\n omnes gentes servient ei.\n12\u00a0Quia liberabit pauperem a potente,\n et pauperem cui non erat adjutor.\n13\u00a0Parcet pauperi et inopi,\n et animas pauperum salvas faciet.\n14\u00a0Ex usuris et iniquitate redimet animas eorum,\n et honorabile nomen eorum coram illo.\n15\u00a0Et vivet, et dabitur ei de auro Arabi\u00e6;\n et adorabunt de ipso semper,\n tota die benedicent ei.\n16\u00a0Et erit firmamentum in terra in summis montium;\n superextolletur super Libanum fructus ejus,\n et florebunt de civitate sicut f\u0153num terr\u00e6.\n17\u00a0Sit nomen ejus benedictum in s\u00e6cula;\n ante solem permanet nomen ejus.\n Et benedicentur in ipso omnes tribus terr\u00e6;\n omnes gentes magnificabunt eum.\n18\u00a0Benedictus Dominus Deus Isra\u00ebl,\n qui facit mirabilia solus.\n19\u00a0Et benedictum nomen majestatis ejus in \u00e6ternum,\n et replebitur majestate ejus omnis terra. Fiat, fiat.]\n20 Defecerunt laudes David, filii Jesse.","title":"Vulgate: Psalms: Psalms Chapter 71","type":"page"}