{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa073.htm","path":"bib/vul/psa073.htm","source_url":"https://sacred-texts.com/bib/vul/psa073.htm","text":"1\u00a0Intellectus Asaph. [Ut quid, Deus, repulisti in finem,\n iratus est furor tuus super oves pascu\u00e6 tu\u00e6?\n2\u00a0Memor esto congregationis tu\u00e6,\n quam possedisti ab initio.\n Redemisti virgam h\u00e6reditatis tu\u00e6,\n mons Sion, in quo habitasti in eo.\n3\u00a0Leva manus tuas in superbias eorum in finem:\n quanta malignatus est inimicus in sancto!\n4\u00a0Et gloriati sunt qui oderunt te in medio solemnitatis tu\u00e6;\n posuerunt signa sua, signa:\n5\u00a0et non cognoverunt sicut in exitu super summum.\n Quasi in silva lignorum securibus\n6\u00a0exciderunt januas ejus in idipsum;\n in securi et ascia dejecerunt eam.\n7\u00a0Incenderunt igni sanctuarium tuum;\n in terra polluerunt tabernaculum nominis tui.\n8\u00a0Dixerunt in corde suo cognatio eorum simul:\n Quiescere faciamus omnes dies festos Dei a terra.\n9\u00a0Signa nostra non vidimus;\n jam non est propheta;\n et nos non cognoscet amplius.\n10\u00a0Usquequo, Deus, improperabit inimicus?\n irritat adversarius nomen tuum in finem?\n11\u00a0Ut quid avertis manum tuam,\n et dexteram tuam de medio sinu tuo in finem?\n12\u00a0Deus autem rex noster ante s\u00e6cula:\n operatus est salutem in medio terr\u00e6.\n13\u00a0Tu confirmasti in virtute tua mare;\n contribulasti capita draconum in aquis.\n14\u00a0Tu confregisti capita draconis;\n dedisti eum escam populis \u00c6thiopum.\n15\u00a0Tu dirupisti fontes et torrentes;\n tu siccasti fluvios Ethan.\n16\u00a0Tuus est dies, et tua est nox;\n tu fabricatus es auroram et solem.\n17\u00a0Tu fecisti omnes terminos terr\u00e6;\n \u00e6statem et ver tu plasmasti ea.\n18\u00a0Memor esto hujus: inimicus improperavit Domino,\n et populus insipiens incitavit nomen tuum.\n19\u00a0Ne tradas bestiis animas confitentes tibi,\n et animas pauperum tuorum ne obliviscaris in finem.\n20\u00a0Respice in testamentum tuum,\n quia repleti sunt qui obscurati sunt terr\u00e6 domibus iniquitatum.\n21\u00a0Ne avertatur humilis factus confusus;\n pauper et inops laudabunt nomen tuum.\n22\u00a0Exsurge, Deus, judica causam tuam;\n memor esto improperiorum tuorum,\n eorum qu\u00e6 ab insipiente sunt tota die.\n23\u00a0Ne obliviscaris voces inimicorum tuorum:\n superbia eorum qui te oderunt ascendit semper.]","title":"Vulgate: Psalms: Psalms Chapter 73","type":"page"}