{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa074.htm","path":"bib/vul/psa074.htm","source_url":"https://sacred-texts.com/bib/vul/psa074.htm","text":"1 In finem, ne corrumpas. Psalmus cantici Asaph.\n2\u00a0[Confitebimur tibi, Deus, confitebimur,\n et invocabimus nomen tuum;\n narrabimus mirabilia tua.\n3\u00a0Cum accepero tempus,\n ego justitias judicabo.\n4\u00a0Liquefacta est terra et omnes qui habitant in ea:\n ego confirmavi columnas ejus.\n5\u00a0Dixi iniquis: Nolite inique agere:\n et delinquentibus: Nolite exaltare cornu:\n6\u00a0nolite extollere in altum cornu vestrum;\n nolite loqui adversus Deum iniquitatem.\n7\u00a0Quia neque ab oriente, neque ab occidente,\n neque a desertis montibus:\n8\u00a0quoniam Deus judex est.\n Hunc humiliat, et hunc exaltat:\n9\u00a0quia calix in manu Domini vini meri, plenus misto.\n Et inclinavit ex hoc in hoc;\n verumtamen f\u00e6x ejus non est exinanita:\n bibent omnes peccatores terr\u00e6.\n10\u00a0Ego autem annuntiabo in s\u00e6culum;\n cantabo Deo Jacob:\n11\u00a0et omnia cornua peccatorum confringam,\n et exaltabuntur cornua justi.]","title":"Vulgate: Psalms: Psalms Chapter 74","type":"page"}