{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa075.htm","path":"bib/vul/psa075.htm","source_url":"https://sacred-texts.com/bib/vul/psa075.htm","text":"1 In finem, in laudibus. Psalmus Asaph, canticum ad Assyrios.\n2\u00a0[Notus in Jud\u00e6a Deus;\n in Isra\u00ebl magnum nomen ejus.\n3\u00a0Et factus est in pace locus ejus,\n et habitatio ejus in Sion.\n4\u00a0Ibi confregit potentias arcuum,\n scutum, gladium, et bellum.\n5\u00a0Illuminans tu mirabiliter a montibus \u00e6ternis;\n6\u00a0turbati sunt omnes insipientes corde.\n Dormierunt somnum suum,\n et nihil invenerunt omnes viri divitiarum in manibus suis.\n7\u00a0Ab increpatione tua, Deus Jacob,\n dormitaverunt qui ascenderunt equos.\n8\u00a0Tu terribilis es; et quis resistet tibi?\n ex tunc ira tua.\n9\u00a0De c\u00e6lo auditum fecisti judicium:\n terra tremuit et quievit\n10\u00a0cum exsurgeret in judicium Deus,\n ut salvos faceret omnes mansuetos terr\u00e6.\n11\u00a0Quoniam cogitatio hominis confitebitur tibi,\n et reliqui\u00e6 cogitationis diem festum agent tibi.\n12\u00a0Vovete et reddite Domino Deo vestro,\n omnes qui in circuitu ejus affertis munera:\n terribili,\n13\u00a0et ei qui aufert spiritum principum:\n terribili apud reges terr\u00e6.]","title":"Vulgate: Psalms: Psalms Chapter 75","type":"page"}