{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa076.htm","path":"bib/vul/psa076.htm","source_url":"https://sacred-texts.com/bib/vul/psa076.htm","text":"1 In finem, pro Idithun. Psalmus Asaph.\n2\u00a0[Voce mea ad Dominum clamavi;\n voce mea ad Deum, et intendit mihi.\n3\u00a0In die tribulationis me\u00e6 Deum exquisivi;\n manibus meis nocte contra eum, et non sum deceptus.\n Renuit consolari anima mea;\n4\u00a0memor fui Dei, et delectatus sum,\n et exercitatus sum, et defecit spiritus meus.\n5\u00a0Anticipaverunt vigilias oculi mei;\n turbatus sum, et non sum locutus.\n6\u00a0Cogitavi dies antiquos,\n et annos \u00e6ternos in mente habui.\n7\u00a0Et meditatus sum nocte cum corde meo,\n et exercitabar, et scopebam spiritum meum.\n8\u00a0Numquid in \u00e6ternum projiciet Deus?\n aut non apponet ut complacitior sit adhuc?\n9\u00a0aut in finem misericordiam suam abscindet,\n a generatione in generationem?\n10\u00a0aut obliviscetur misereri Deus?\n aut continebit in ira sua misericordias suas?\n11\u00a0Et dixi: Nunc c\u0153pi;\n h\u00e6c mutatio dexter\u00e6 Excelsi.\n12\u00a0Memor fui operum Domini,\n quia memor ero ab initio mirabilium tuorum:\n13\u00a0et meditabor in omnibus operibus tuis,\n et in adinventionibus tuis exercebor.\n14\u00a0Deus, in sancto via tua:\n quis deus magnus sicut Deus noster?\n15\u00a0Tu es Deus qui facis mirabilia:\n notam fecisti in populis virtutem tuam.\n16\u00a0Redemisti in brachio tuo populum tuum,\n filios Jacob et Joseph.\n17\u00a0Viderunt te aqu\u00e6, Deus;\n viderunt te aqu\u00e6, et timuerunt:\n et turbat\u00e6 sunt abyssi.\n18\u00a0Multitudo sonitus aquarum;\n vocem dederunt nubes.\n Etenim sagitt\u00e6 tu\u00e6 transeunt;\n19\u00a0vox tonitrui tui in rota.\n Illuxerunt coruscationes tu\u00e6 orbi terr\u00e6;\n commota est, et contremuit terra.\n20\u00a0In mari via tua, et semit\u00e6 tu\u00e6 in aquis multis,\n et vestigia tua non cognoscentur.\n21\u00a0Deduxisti sicut oves populum tuum,\n in manu Moysi et Aaron.]","title":"Vulgate: Psalms: Psalms Chapter 76","type":"page"}