{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa077.htm","path":"bib/vul/psa077.htm","source_url":"https://sacred-texts.com/bib/vul/psa077.htm","text":"1\u00a0Intellectus Asaph. [Attendite, popule meus, legem meam;\n inclinate aurem vestram in verba oris mei.\n2\u00a0Aperiam in parabolis os meum;\n loquar propositiones ab initio.\n3\u00a0Quanta audivimus, et cognovimus ea,\n et patres nostri narraverunt nobis.\n4\u00a0Non sunt occultata a filiis eorum in generatione altera,\n narrantes laudes Domini et virtutes ejus,\n et mirabilia ejus qu\u00e6 fecit.\n5\u00a0Et suscitavit testimonium in Jacob,\n et legem posuit in Isra\u00ebl,\n quanta mandavit patribus nostris\n nota facere ea filiis suis:\n6\u00a0ut cognoscat generatio altera:\n filii qui nascentur et exsurgent,\n et narrabunt filiis suis,\n7\u00a0ut ponant in Deo spem suam,\n et non obliviscantur operum Dei,\n et mandata ejus exquirant:\n8\u00a0ne fiant, sicut patres eorum,\n generatio prava et exasperans;\n generatio qu\u00e6 non direxit cor suum,\n et non est creditus cum Deo spiritus ejus.\n9\u00a0Filii Ephrem, intendentes et mittentes arcum,\n conversi sunt in die belli.\n10\u00a0Non custodierunt testamentum Dei,\n et in lege ejus noluerunt ambulare.\n11\u00a0Et obliti sunt benefactorum ejus,\n et mirabilium ejus qu\u00e6 ostendit eis.\n12\u00a0Coram patribus eorum fecit mirabilia\n in terra \u00c6gypti, in campo Taneos.\n13\u00a0Interrupit mare, et perduxit eos,\n et statuit aquas quasi in utre:\n14\u00a0et deduxit eos in nube diei,\n et tota nocte in illuminatione ignis.\n15\u00a0Interrupit petram in eremo,\n et adaquavit eos velut in abysso multa.\n16\u00a0Et eduxit aquam de petra,\n et deduxit tamquam flumina aquas.\n17\u00a0Et apposuerunt adhuc peccare ei;\n in iram excitaverunt Excelsum in inaquoso.\n18\u00a0Et tentaverunt Deum in cordibus suis,\n ut peterent escas animabus suis.\n19\u00a0Et male locuti sunt de Deo;\n dixerunt: Numquid poterit Deus parare mensam in deserto?\n20\u00a0quoniam percussit petram, et fluxerunt aqu\u00e6,\n et torrentes inundaverunt.\n Numquid et panem poterit dare,\n aut parare mensam populo suo?\n21\u00a0Ideo audivit Dominus et distulit;\n et ignis accensus est in Jacob,\n et ira ascendit in Isra\u00ebl:\n22\u00a0quia non crediderunt in Deo,\n nec speraverunt in salutari ejus.\n23\u00a0Et mandavit nubibus desuper,\n et januas c\u00e6li aperuit.\n24\u00a0Et pluit illis manna ad manducandum,\n et panem c\u00e6li dedit eis.\n25\u00a0Panem angelorum manducavit homo;\n cibaria misit eis in abundantia.\n26\u00a0Transtulit austrum de c\u00e6lo,\n et induxit in virtute sua africum.\n27\u00a0Et pluit super eos sicut pulverem carnes,\n et sicut arenam maris volatilia pennata.\n28\u00a0Et ceciderunt in medio castrorum eorum,\n circa tabernacula eorum.\n29\u00a0Et manducaverunt, et saturati sunt nimis,\n et desiderium eorum attulit eis:\n30\u00a0non sunt fraudati a desiderio suo.\n Adhuc esc\u00e6 eorum erant in ore ipsorum,\n31\u00a0et ira Dei ascendit super eos:\n et occidit pingues eorum,\n et electos Isra\u00ebl impedivit.\n32\u00a0In omnibus his peccaverunt adhuc,\n et non crediderunt in mirabilibus ejus.\n33\u00a0Et defecerunt in vanitate dies eorum,\n et anni eorum cum festinatione.\n34\u00a0Cum occideret eos, qu\u00e6rebant eum et revertebantur,\n et diluculo veniebant ad eum.\n35\u00a0Et rememorati sunt quia Deus adjutor est eorum,\n et Deus excelsus redemptor eorum est.\n36\u00a0Et dilexerunt eum in ore suo,\n et lingua sua mentiti sunt ei;\n37\u00a0cor autem eorum non erat rectum cum eo,\n nec fideles habiti sunt in testamento ejus.\n38\u00a0Ipse autem est misericors,\n et propitius fiet peccatis eorum,\n et non disperdet eos.\n Et abundavit ut averteret iram suam,\n et non accendit omnem iram suam.\n39\u00a0Et recordatus est quia caro sunt,\n spiritus vadens et non rediens.\n40\u00a0Quoties exacerbaverunt eum in deserto;\n in iram concitaverunt eum in inaquoso?\n41\u00a0Et conversi sunt, et tentaverunt Deum,\n et sanctum Isra\u00ebl exacerbaverunt.\n42\u00a0Non sunt recordati manus ejus,\n die qua redemit eos de manu tribulantis:\n43\u00a0sicut posuit in \u00c6gypto signa sua,\n et prodigia sua in campo Taneos;\n44\u00a0et convertit in sanguinem flumina eorum,\n et imbres eorum, ne biberent.\n45\u00a0Misit in eos c\u0153nomyiam, et comedit eos,\n et ranam, et disperdidit eos;\n46\u00a0et dedit \u00e6rugini fructus eorum,\n et labores eorum locust\u00e6;\n47\u00a0et occidit in grandine vineas eorum,\n et moros eorum in pruina;\n48\u00a0et tradidit grandini jumenta eorum,\n et possessionem eorum igni;\n49\u00a0misit in eos iram indignationis su\u00e6,\n indignationem, et iram, et tribulationem,\n immissiones per angelos malos.\n50\u00a0Viam fecit semit\u00e6 ir\u00e6 su\u00e6:\n non pepercit a morte animabus eorum,\n et jumenta eorum in morte conclusit:\n51\u00a0et percussit omne primogenitum in terra \u00c6gypti;\n primitias omnis laboris eorum in tabernaculis Cham:\n52\u00a0et abstulit sicut oves populum suum,\n et perduxit eos tamquam gregem in deserto:\n53\u00a0et deduxit eos in spe, et non timuerunt,\n et inimicos eorum operuit mare.\n54\u00a0Et induxit eos in montem sanctificationis su\u00e6,\n montem quem acquisivit dextera ejus;\n et ejecit a facie eorum gentes,\n et sorte divisit eis terram in funiculo distributionis;\n55\u00a0et habitare fecit in tabernaculis eorum tribus Isra\u00ebl.\n56\u00a0Et tentaverunt, et exacerbaverunt Deum excelsum,\n et testimonia ejus non custodierunt.\n57\u00a0Et averterunt se, et non servaverunt pactum:\n quemadmodum patres eorum, conversi sunt in arcum pravum.\n58\u00a0In iram concitaverunt eum in collibus suis,\n et in sculptilibus suis ad \u00e6mulationem eum provocaverunt.\n59\u00a0Audivit Deus, et sprevit,\n et ad nihilum redegit valde Isra\u00ebl.\n60\u00a0Et repulit tabernaculum Silo,\n tabernaculum suum, ubi habitavit in hominibus.\n61\u00a0Et tradidit in captivitatem virtutem eorum,\n et pulchritudinem eorum in manus inimici.\n62\u00a0Et conclusit in gladio populum suum,\n et h\u00e6reditatem suam sprevit.\n63\u00a0Juvenes eorum comedit ignis,\n et virgines eorum non sunt lamentat\u00e6.\n64\u00a0Sacerdotes eorum in gladio ceciderunt,\n et vidu\u00e6 eorum non plorabantur.\n65\u00a0Et excitatus est tamquam dormiens Dominus,\n tamquam potens crapulatus a vino.\n66\u00a0Et percussit inimicos suos in posteriora;\n opprobrium sempiternum dedit illis.\n67\u00a0Et repulit tabernaculum Joseph,\n et tribum Ephraim non elegit:\n68\u00a0sed elegit tribum Juda,\n montem Sion, quem dilexit.\n69\u00a0Et \u00e6dificavit sicut unicornium sanctificium suum,\n in terra quam fundavit in s\u00e6cula.\n70\u00a0Et elegit David, servum suum,\n et sustulit eum de gregibus ovium;\n de post f\u0153tantes accepit eum:\n71\u00a0pascere Jacob servum suum,\n et Isra\u00ebl h\u00e6reditatem suam.\n72\u00a0Et pavit eos in innocentia cordis sui,\n et in intellectibus manuum suarum deduxit eos.]","title":"Vulgate: Psalms: Psalms Chapter 77","type":"page"}