{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa078.htm","path":"bib/vul/psa078.htm","source_url":"https://sacred-texts.com/bib/vul/psa078.htm","text":"1\u00a0Psalmus Asaph. [Deus, venerunt gentes in h\u00e6reditatem tuam;\n polluerunt templum sanctum tuum;\n posuerunt Jerusalem in pomorum custodiam.\n2\u00a0Posuerunt morticina servorum tuorum escas volatilibus c\u00e6li;\n carnes sanctorum tuorum bestiis terr\u00e6.\n3\u00a0Effuderunt sanguinem eorum tamquam aquam in circuitu Jerusalem,\n et non erat qui sepeliret.\n4\u00a0Facti sumus opprobrium vicinis nostris;\n subsannatio et illusio his qui in circuitu nostro sunt.\n5\u00a0Usquequo, Domine, irasceris in finem?\n accendetur velut ignis zelus tuus?\n6\u00a0Effunde iram tuam in gentes qu\u00e6 te non noverunt,\n et in regna qu\u00e6 nomen tuum non invocaverunt:\n7\u00a0quia comederunt Jacob,\n et locum ejus desolaverunt.\n8\u00a0Ne memineris iniquitatum nostrarum antiquarum;\n cito anticipent nos misericordi\u00e6 tu\u00e6,\n quia pauperes facti sumus nimis.\n9\u00a0Adjuva nos, Deus salutaris noster,\n et propter gloriam nominis tui, Domine, libera nos:\n et propitius esto peccatis nostris, propter nomen tuum.\n10\u00a0Ne forte dicant in gentibus: Ubi est Deus eorum?\n et innotescat in nationibus coram oculis nostris\n ultio sanguinis servorum tuorum qui effusus est.\n11\u00a0Intro\u00ebat in conspectu tuo gemitus compeditorum;\n secundum magnitudinem brachii tui posside filios mortificatorum:\n12\u00a0et redde vicinis nostris septuplum in sinu eorum;\n improperium ipsorum quod exprobraverunt tibi, Domine.\n13\u00a0Nos autem populus tuus, et oves pascu\u00e6 tu\u00e6,\n confitebimur tibi in s\u00e6culum;\n in generationem et generationem annuntiabimus laudem tuam.]","title":"Vulgate: Psalms: Psalms Chapter 78","type":"page"}