{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa079.htm","path":"bib/vul/psa079.htm","source_url":"https://sacred-texts.com/bib/vul/psa079.htm","text":"1 In finem, pro iis qui commutabuntur. Testimonium Asaph, psalmus.\n2\u00a0[Qui regis Isra\u00ebl, intende;\n qui deducis velut ovem Joseph.\n Qui sedes super cherubim, manifestare\n3\u00a0coram Ephraim, Benjamin, et Manasse.\n Excita potentiam tuam, et veni,\n ut salvos facias nos.\n4\u00a0Deus, converte nos, et ostende faciem tuam,\n et salvi erimus.\n5\u00a0Domine Deus virtutum,\n quousque irasceris super orationem servi tui?\n6\u00a0cibabis nos pane lacrimarum,\n et potum dabis nobis in lacrimis in mensura?\n7\u00a0Posuisti nos in contradictionem vicinis nostris,\n et inimici nostri subsannaverunt nos.\n8\u00a0Deus virtutum, converte nos, et ostende faciem tuam,\n et salvi erimus.\n9\u00a0Vineam de \u00c6gypto transtulisti:\n ejecisti gentes, et plantasti eam.\n10\u00a0Dux itineris fuisti in conspectu ejus;\n plantasti radices ejus, et implevit terram.\n11\u00a0Operuit montes umbra ejus,\n et arbusta ejus cedros Dei.\n12\u00a0Extendit palmites suos usque ad mare,\n et usque ad flumen propagines ejus.\n13\u00a0Ut quid destruxisti maceriam ejus,\n et vindemiant eam omnes qui pr\u00e6tergrediuntur viam?\n14\u00a0Exterminavit eam aper de silva,\n et singularis ferus depastus est eam.\n15\u00a0Deus virtutum, convertere,\n respice de c\u00e6lo, et vide,\n et visita vineam istam:\n16\u00a0et perfice eam quam plantavit dextera tua,\n et super filium hominis quem confirmasti tibi.\n17\u00a0Incensa igni et suffossa,\n ab increpatione vultus tui peribunt.\n18\u00a0Fiat manus tua super virum dexter\u00e6 tu\u00e6,\n et super filium hominis quem confirmasti tibi.\n19\u00a0Et non discedimus a te:\n vivificabis nos, et nomen tuum invocabimus.\n20\u00a0Domine Deus virtutum, converte nos, et ostende faciem tuam,\n et salvi erimus.]","title":"Vulgate: Psalms: Psalms Chapter 79","type":"page"}