{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa080.htm","path":"bib/vul/psa080.htm","source_url":"https://sacred-texts.com/bib/vul/psa080.htm","text":"1 In finem, pro torcularibus. Psalmus ipsi Asaph.\n2\u00a0[Exsultate Deo adjutori nostro;\n jubilate Deo Jacob.\n3\u00a0Sumite psalmum, et date tympanum;\n psalterium jucundum cum cithara.\n4\u00a0Buccinate in neomenia tuba,\n in insigni die solemnitatis vestr\u00e6:\n5\u00a0quia pr\u00e6ceptum in Isra\u00ebl est,\n et judicium Deo Jacob.\n6\u00a0Testimonium in Joseph posuit illud,\n cum exiret de terra \u00c6gypti;\n linguam quam non noverat, audivit.\n7\u00a0Divertit ab oneribus dorsum ejus;\n manus ejus in cophino servierunt.\n8\u00a0In tribulatione invocasti me, et liberavi te.\n Exaudivi te in abscondito tempestatis;\n probavi te apud aquam contradictionis.\n9\u00a0Audi, populus meus, et contestabor te.\n Isra\u00ebl, si audieris me,\n10\u00a0non erit in te deus recens,\n neque adorabis deum alienum.\n11\u00a0Ego enim sum Dominus Deus tuus,\n qui eduxi te de terra \u00c6gypti.\n Dilata os tuum, et implebo illud.\n12\u00a0Et non audivit populus meus vocem meam,\n et Isra\u00ebl non intendit mihi.\n13\u00a0Et dimisi eos secundum desideria cordis eorum;\n ibunt in adinventionibus suis.\n14\u00a0Si populus meus audisset me,\n Isra\u00ebl si in viis meis ambulasset,\n15\u00a0pro nihilo forsitan inimicos eorum humiliassem,\n et super tribulantes eos misissem manum meam.\n16\u00a0Inimici Domini mentiti sunt ei,\n et erit tempus eorum in s\u00e6cula.\n17\u00a0Et cibavit eos ex adipe frumenti,\n et de petra melle saturavit eos.]","title":"Vulgate: Psalms: Psalms Chapter 80","type":"page"}