{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa082.htm","path":"bib/vul/psa082.htm","source_url":"https://sacred-texts.com/bib/vul/psa082.htm","text":"1 Canticum Psalmi Asaph.\n2\u00a0[Deus, quis similis erit tibi?\n ne taceas, neque compescaris, Deus:\n3\u00a0quoniam ecce inimici tui sonuerunt,\n et qui oderunt te extulerunt caput.\n4\u00a0Super populum tuum malignaverunt consilium,\n et cogitaverunt adversus sanctos tuos.\n5\u00a0Dixerunt: Venite, et disperdamus eos de gente,\n et non memoretur nomen Isra\u00ebl ultra.\n6\u00a0Quoniam cogitaverunt unanimiter;\n simul adversum te testamentum disposuerunt:\n7\u00a0tabernacula Idum\u00e6orum et Ismahelit\u00e6,\n Moab et Agareni,\n8\u00a0Gebal, et Ammon, et Amalec;\n alienigen\u00e6 cum habitantibus Tyrum.\n9\u00a0Etenim Assur venit cum illis:\n facti sunt in adjutorium filiis Lot.\n10\u00a0Fac illis sicut Madian et Sisar\u00e6,\n sicut Jabin in torrente Cisson.\n11\u00a0Disperierunt in Endor;\n facti sunt ut stercus terr\u00e6.\n12\u00a0Pone principes eorum sicut Oreb,\n et Zeb, et Zebee, et Salmana:\n omnes principes eorum,\n13\u00a0qui dixerunt: H\u00e6reditate possideamus sanctuarium Dei.\n14\u00a0Deus meus, pone illos ut rotam,\n et sicut stipulam ante faciem venti.\n15\u00a0Sicut ignis qui comburit silvam,\n et sicut flamma comburens montes,\n16\u00a0ita persequeris illos in tempestate tua,\n et in ira tua turbabis eos.\n17\u00a0Imple facies eorum ignominia,\n et qu\u00e6rent nomen tuum, Domine.\n18\u00a0Erubescant, et conturbentur in s\u00e6culum s\u00e6culi,\n et confundantur, et pereant.\n19\u00a0Et cognoscant quia nomen tibi Dominus:\n tu solus Altissimus in omni terra.]","title":"Vulgate: Psalms: Psalms Chapter 82","type":"page"}