{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa083.htm","path":"bib/vul/psa083.htm","source_url":"https://sacred-texts.com/bib/vul/psa083.htm","text":"1 In finem, pro torcularibus filiis Core. Psalmus.\n2\u00a0[Quam dilecta tabernacula tua, Domine virtutum!\n3\u00a0Concupiscit, et deficit anima mea in atria Domini;\n cor meum et caro mea exsultaverunt in Deum vivum.\n4\u00a0Etenim passer invenit sibi domum,\n et turtur nidum sibi, ubi ponat pullos suos:\n altaria tua, Domine virtutum,\n rex meus, et Deus meus.\n5\u00a0Beati qui habitant in domo tua, Domine;\n in s\u00e6cula s\u00e6culorum laudabunt te.\n6\u00a0Beatus vir cujus est auxilium abs te:\n ascensiones in corde suo disposuit,\n7\u00a0in valle lacrimarum, in loco quem posuit.\n8\u00a0Etenim benedictionem dabit legislator;\n ibunt de virtute in virtutem:\n videbitur Deus deorum in Sion.\n9\u00a0Domine Deus virtutum, exaudi orationem meam;\n auribus percipe, Deus Jacob.\n10\u00a0Protector noster, aspice, Deus,\n et respice in faciem christi tui.\n11\u00a0Quia melior est dies una in atriis tuis super millia;\n elegi abjectus esse in domo Dei mei\n magis quam habitare in tabernaculis peccatorum.\n12\u00a0Quia misericordiam et veritatem diligit Deus:\n gratiam et gloriam dabit Dominus.\n13\u00a0Non privabit bonis eos qui ambulant in innocentia:\n Domine virtutum, beatus homo qui sperat in te.]","title":"Vulgate: Psalms: Psalms Chapter 83","type":"page"}